«Häkim bolsaň, halky Gün kibi çoýgul»

Döwletli bolmak halklaryň arzuwlan maksadydyr. Arzuwlar döwletiň garaşyk etmegi we ýolbaşçylygy bolmasa, hasyl bolmaýarlar. Beýik Biribaryň ýeke-täk beýikligine tagzym edip, Ruhnamany türkmeniň asly, şu güni, ertiri etmek üçin zehini ýiti, parasatly, öňde-soňda haram ýokmaýan ýolbaşçylar gerek. Watandaş, sen arçyn, sen hakyky arçyn boljak bolsaň, tutuş obanyň atasam sensiň, enesem sensiň. Sen tutuş obanyň hyzmatynda gije-gündiz ylgap ýören adam bolmalysyň. Eger sen özüňi obanyň hojaýyny hasap edip, obaň bähbidini öz bähbidiňden ileri tutmaýan bolsaň, seniň ýoluň biziň ýolumyz bilen bir däldir.

Sen etrabyň ýa welaýatyň häkimi bolsaň, etrabyň, welaýatyň ykbaly seniň gerdeniňde bolsun. Sen Magtymguly atamyzyň «Häkim bolsaň, halky Gün kibi çoýgul» diýşi ýaly, halkyňy çoýup bilmeseň, senden häkim bolmaz.

(382)

Türkmeniň dürli derejeli ýolbaşçylary türkmeniň baş ýolbaşçysyny goldap, orta çykmalydyrlar

Biziň ýaşaýan dünýämizde, bagtly, sazlaşykly durmuşyň döwründe tebigy heläkçiligiň ýa-da döwletiň içinden, daşyndan betpäl adamlaryň täsiri astynda agyr betbagtçylygyň bolaýan mahaly (owal bolmasyn, Allam!), türkmeniň dürli derejeli ýolbaşçylary türkmeniň baş ýolbaşçysyny goldap, orta çykmalydyrlar. Özüňi oka tutmak, batyrlykdyr öýdüp ölümi kabul etmek ýa-da kyn günde kelläňi köwege salyp ýatmak türkmende «Ölümden aňyrda namartlyk ýatyr» diýmekdir.

(382-383)

Agzybirligi berkitmek türkmenleriň her ýolbaşçysyna degişlidir

Türkmenler, her bir ösen döwründe, diňe içki oňşuk­syzlyklar, özara uruşlar zerarly birek-biregi gyryp, kuwwatly döwletlerini ýykypdyrlar. Biz muny sapak edinip, agzybir­ligimizi has-da berkitmelidiris.

Bu sözler döwlet ýolbaşçylaryna, pudak, şäher, zawod-fabrikleriň ýolbaşçylaryna, türkmenleriň her ýolbaşçysyna degişlidir.

Ýolbaşçylara köp zatlar baglydyr

Ýolbaşçylara köp zatlar baglydyr. Prezident hökmünde men her ýolbaşçy saýlanylýan adamyň il-günüň, Watanyň bähbidine berilmegini, özüne ynanylan işe jany-teni bilen ýapyşmagyny gazanmaga borçludyryn. Türkmenistanda döwlet gullugyna işe bellenilýän adamlary saýlap-seçip almak barada biziň Halk maslahatymyzda milli kanun kabul etmegimiz gerek. Ol kanunda Türkmenistanda döwlet gullugyny geçmegiň täze görnüşlerini düzmek, ornaşdyrmak, döwlet edaralarynyň işgärler gullugynyň netijeli ulgamyny döretmek, şeýle hem döwletiň wezipeli adamlarynyň we döwlet gullukçylarynyň öz işiniň netijeliligi üçin jogapkärçiligini ýokarlandyrmak; döwlet gullugyna Türkmenistanyň raýatlarynyň elýeterligine bolan kanuny hukugy kepillendirmek ulgamy bilen üpjün etmek, gulluga milletine, gelip çykyşyna, emläk we wezipe ýagdaýyna, ýaşaýan ýerine, dine bolan garaýşyna garamazdan, Türkmenistanyň ähli raýatlary öz ukyplaryna we hünärleýin taýýarlygyna laýyklykda döwlet gullugyna elýeterli deň hukuk bermek; şunda ýokary bilim derejesi — hünärmenligi, syýasy we hukuk medeniýeti bilen tapawutlanýan, halal, öz oý-pikirlerinde, işlerinde päk ýüreklilik, öz Watanyna, halkyna, Türkmenistanyň Prezidentine berlenlik ýagdaýy aýratyn bellenilmelidir. Çünki men öz tejribämden bilýärin: ýolbaşçy işe ukyply, başarjaň hünärmenleri saýlap almagy, olaryň işine sazlaşykly gözegçiligi, ýolbaşçylygy üpjün etmegi başarsa, şol edarada sagdyn gatnaşyklar, özgerişlikler döreýär.

Döwlete, il-güne berlen adamlary mynasyp döwlet gullugyna bellemek möhüm wezipedir. Ýolbaşçy şahsy bähbidinden, etrap, welaýat bähbidinden il-günüň, halkyň, döwletiň bähbidini ileri tutmalydyr.

(272-273)