Türkmenistan we Russiýa Federasiýasy,

SSR Soýuzynyň we onuň hukuk oruntutarlarynyň daşary ýurtly algydarlara bergisi barada özara düşünişmek hakyndaky 1991-nji ýylyň 28-nji oktýabryndaky Memorandumy hem-de SSR Soýuzynyň daşarky döwlet bergisi we algylary babatda hukuk oruntutarlyk hakyndaky 1991-nji ýylyň 4-nji dekabryndaky Şertnamany tassyklap,

hem-de ozalky SSR Soýuzynyň daşarky döwlet bergileri we algylary babatda iki tarapy hem gyzyklandyrýan hukuk oruntutarlyk meselelerini öz arasynda gutarnykly düzgünleşdirmäge çalşyp,

şular barada ylalaşdy:

1-nji madda

Şu Ylalaşygyň maksatlary üçin ozalky SSR Soýuzynyň daşarky döwlet bergisi we algylary diýlende olaryň SSR Soýuzynyň daşarky döwlet bergisi we algylary babatda hukuk oruntutarlyk hakyndaky 1991-nji ýylyň 4-nji dekabryndaky Şertnamanyň 1-nji maddasynyň «a» we «b» bölümlerinde berlen kesgitlemeler göz öňünde tutulýar.

2-nji madda

Taraplar ozalky SSR Soýuzynyň daşarky döwlet bergisinde we algylarynda Türkmenistanyň ýeke-täk anyklanylan görkeziji esasynda kesgitlenilen paýynyň ýüzden 0,70-e barabardygyny tassyklaýar.

3-nji madda

Ozalky SSR Soýuzynyň 1991-nji ýylyň 1-nji dekabryndaky ýagdaý boýunça döwlet daşarky bergisindäki Türkmenistanyň paýyny tölemek boýunça borçnamalary Türkmenistan berýär, Russiýa Federasiýasy bolsa öz üstüne kabul edýär.

4-nji madda

Ozalky SSR Soýuzynyň 1991-nji ýylyň 1-nji dekabryndaky ýagdaý boýunça algylarynda Türkmenistanyň paýyny Russiýa Federasiýasy kabul edýär, Türkmenistan bolsa berýär.

5-nji madda

Şu Ylalaşyk güýje giren pursatyndan başlap, ozalky SSR Soýuzynyň daşarky döwlet bergisi we onuň algylary babatda SSR Soýuzynyň daşarky döwlet bergisi we algysy babatda hukuk oruntutarlyk hakyndaky 1991-nji ýylyň 4-nji dekabryndaky Şertnamada hem-de ozalky SSR Soýuzynyň daşary ýurtlardaky ähli eýeçiligini paýlamak hakyndaky 1992-nji ýylyň 6-njy iýulyndaky Ylalaşykda kesgitlenilen, Taraplaryň arasyndaky ähli meseleler düzgünleşdirilen bolup durýar.

6-njy madda

Şu Ylalaşyk oňa gol çekilen günden başlap güýje girýär.

Moskwa şäherinde 1992-nji ýylyň 31-nji iýulynda her biri türkmen we rus dillerinde iki nusgada amal edildi, özi-de iki tekstiň hem birmeňzeş güýji bardyr.

(52-nji sah.)