Jennet ýaly ýurtlardan ata Watanyň has ýagşydyr

Içi-daşy bezemen, kaşaň jaý ýagşydyr, emma içinde ýürekdeşiň bar jaý has ýagşydyr. Jennet ýaly owadan ýurtlar ýagşydyr, emma öz ýurduň, ata Watanyň has ýagşydyr.

(31)

Biz dünýä ýaýran türkmeniň ata Watanynda tagt dikip, türkmeniň halk döwletini gurduk.

(60)

Ykbalymyň Watanyň ykbaly bilen meňzeşligi

Meniň munda beýan eden duýgularymyň özümiň Ruhnamany ýazmaga oturan wagtymdan has ozal ýüregimde mesgen tutan duýgularymyň bolandygyny biygtyýar aňlamak özüm üçin hem tötänlik boldy. Ol duýgular ýigit çykan, Watanyň ruhuny, Watanyň mährini hem gadyr-gymmatyny syzan günlerim döräpdi. Watan bilen hemsyrdaş bolmagymyň aňyrsynda bolsa ykballarymyzyň — meniň hem Watanymyň ykbalynyň meňzeşligi ýatýardy. Ata-eneden, doganlarymdan aýrylyp, men özümi süňňüm bilenem, ruhum bilenem ýalňyz duýýardym. Watan hem şeýle ýagdaýdady. Özüniň birwagtky mert ärlerinden, merdanalaryndan jyda düşen Watanyň hasratyny ýiti duýýardym.

(73)

Watan ýalňyzdy, hossarsyzdy

Gypjak obasy bilen Aşgabat şäheriniň, Büzmeýin bilen Ymam Kasym gonamçylygynyň arasyny paý-u-pyýada geçýärkäm, Watanyň ýalňyzlygyny, hossarsyzlygyny hem ruhy çolalygyny syzýardym.

Gugaryp galan depeler, çolaryp galan düzlükler, sogulyp galan çeşmeler, epilip galan derekler, külbe bolan ymaratlar, sulba bolan Watan — bu zatlaryň bary meniň daşymda däl-de, içimde — ýüregimde ezýetli ýaşaýardylar.

Watan maňa ýüzüne urlup, tükgerilip ýatan naçary ýatladýardy.

Watan bilen ykbaldaşlygym meni indi-indiler bir pelsepe açyşyna iterýär — sebäp diýeniňde, islendik pelsepe açyşynyň deslapky şerti — duýgy açyşydyr.

(73)

Milletiň bagty Watanyny, ýurduny batyrgaý gorap bilmegindedir

Görogly begiň ruhy:

Anyk ýoly bar millet bagtlydyr. Milletiň bagty Watanyny, ýurduny batyrgaý gorap bilmegindedir. Milletiň bagty bu gün seniň eliňde. Sen türkmen milletiňe altyn ýaşaýşyň güzerini görkez, ol seniň taglymatyň bolar, ol seniň ýoluň bolar Saparmyrat!  — diýdi.

(148)

Aga-gara düşünip, okap-öwrenip ugranymdan soň, men eziz watanymyň hem ýetimdigine, halkymyň hem ýesirdigine göz ýetirdim. Ýaradanyň ýagty jahanynda gözlerimden monjuk-monjuk ýaş akdyrmasam-da, ýaradar ýüregimiň ganyny sarkdyryp gezmeli boldum. Bendiniň janyndan geçip öz ýurduny agtaryşy ýaly, ýetimiň ata-babasyny, ýakyn garyndaşyny agtaryşy ýaly men kitaplar dünýäsine gidip, merdana ata-babalarymyň ruhlaryny agtardym.

(154)

Leningradda okap başlanymda söýdügim söwer topragymdan hem jyda düşdüm. Men kitaphanalara gatnap, watanymyň goýnuna giren ýaly taryhyň goýnuna girdim. Leningradda okan ýyllarym halkymyň bäş müň ýyllyk taryhyny öwran-öwran okap çykdym.

Alys ýola ugranyňda ejeň ýanyňa bir kesemen çörek salyp goýberýär, mende bolsa eje ýok, men gursagyma «Türkmen»  diýen gudratly sözi salyp gitdim.

Alys ýola ugranyňda ataň ak pata berip goýberýär, emma mende ata ýok, ak patany ata Watanymdan alyp gitdim...

(156)

Kim Watanyny depesinde täç eýlese, Watany hem ony başyna täç eýlär.

(166)

Däli adyny göteren kişi — özüni watana bagyş eden kişi

Gorkut ata zamanalary är ýigitlere — däliler diýilýän eken. Däli Domrul, Däli Garçar. «Görogly»  eposynda Däli Mätel, Harman Däli. Däli adyny göteren kişi — özüni watana bagyş eden kişi bolýan eken.

(170)

Watany mukaddeslige göterip, watan üçin ölen ýigidiň ölmez-ýitmez bolýandygyna bütin durky bilen ynanan halk nädip edermen bolmasyn!

(171)

Türkmen milleti watanyna «ata Watan» diýip ýüzlenýändir

«Oguznamalary»  alyp görüň, ýa bolmasa, «Gorkut atany»  ýa-da «Göroglyny»  okap görüň: tebigat bilen şeýle näzik, mährem gatnaşyklary görersiňiz. Bu ataly ogluň gatnaşyklaryny ýada salýar. Megerem, şonuň üçin türkmen milleti watanyna «ata Watan»  diýip ýüzlenýändir.

(180)

Watana, ýurda gezek gelende türkmende puluň, altynyň gymmaty ýokdur

Gökdepe urşuna gatnaşan daşary ýurtlular, gyrgynçylygyň onlarça harby serkerdeleri bu söweşiň taryhy, umuman, türkmen topragy barada ýazan senenamalarynda, ählisi dil birikdiren ýaly, türkmende ýeke dönügiň hem bolmandygyny, dönük beýlede dursun, ýol salgy alar ýaly, on ýedinji derejeli maglumaty alar ýaly adamy hem tapyp bilmändiklerini, watana, ýurda gezek gelende türkmende pul, altyn diýilýän zatlaryň gymmatynyň ýokdugyny dogruçyllyk bilen beýan edipdirler.

(188)

Eý, gardaşym, türkmen hudaýly mawy asmanynyň astynda, pirli topragynyň üstünde elli asyrlap ata-babalarynyň ýaradan keramatlarynyň arasynda millet bolup kemala gelip, watany bilen bagryny badaşdyrandyr. Biz şu eziz Watandan gögerip çykyp, şu asman bilen bitewileşendiris. Öz beýik milletiňe mynasyp bolmak her bir türkmeniň jana-jan borjudyr!

(200)

Türkmene Altyn asyrda Watan diýip urýan ýürekler, Watan üçin diýip işleýän akyllar gerek. Watan hem millet her bir şahsyýetiň dilinde dogasy, işlerinde itergisi bolmalydyr.

(201)

Türkmeniň ata Watana söýgüsini beýan edýän tymsal

Ata-babalarymyz ata Watana nähili beýik sarpa-hormat goýandygyny tymsallarda, rowaýatlarda goýup gidipdir.

Ine, türkmeniň ata Watana söýgüsini beýan edýän bir tymsal.

Entek Oguz hanyň döwleti kuwwatlanyp ýetişmänkä, haýsydyr bir güýçli döwlet yrsarap, uruş edip, onuň ýurduny basyp aljak bolupdyr. Ol ilçi ugradyp, ýurduň saýlama atyny bermegi sorapdyr. Oguz hanyň serkerdeleri:

— Duşman yrsaraýar, urşalyň, emma saýlama bedewi bermäliň. At biziň garyndaşymyzdyr — diýşipdirler. Emma Oguz han:

— Zeleliň kiçisi barka, ulusyna ýapyşmaň! Bardy-geldi duşmandan asgyn düşsek, ähli atlar duşmanyňky bolar! Berip goýberiň bir aty — diýipdir.

Saý aty alyp giden ilçi ýaňadan has şum habar bilen gelýär. Bu gezek duşman ýurduň iň saýlama gözelini soraýar. Serkerdeler ýene uruşmagy teklip edýärler, emma dana atamyz Oguz han:

— Uruş bolsa, men-men diýen ýigitler söweşde öler, bardy-geldi duşmandan ýeňläýsek, gelin-gyzlar duşmana ýesir bolar! Zyýanyň kiçisi barka, ulusyna ýapyşmaň — diýipdir.

Saýlama oguz gözelini alyp giden ilçi has şum habar bilen gelýär. Ol ýer soraýar. Urşuň gutulgysyzlygyna düşünip, şonça wagtda ýurdy urşa taýynlap ýetişen Oguz han:

Ser bereris, ýer bermeris! — diýipdir. Urşupdyr, päli azan duşmany kül-peýekun hem edipdir.

(249)

Prezident hökmünde men her ýolbaşçy saýlanylýan adamyň il-günüň, watanyň bähbidine berilmegini, özüne ynanylan işe jany-teni bilen ýapyşmagyny gazanmaga borçludyryn.(272)

(272)

Däli köňlüm telwas eýle, aram jaýym Watandadyr,
Oka, öwren, yhlas eýle, şöhrat-şanym Watandadyr,
Gyş gutaryp kükräp gelen joşgun ýazym Watandadyr,
Ýasym sowup, toýum tutjak ýakyn-ýadym Watandadyr,
Ýat illerden mesgen bolmaz, göbek ganym Watandadyr.

Beýik Saparmyrat Türkmenbaşynyň «Watandadyr» goşgusyndan.

(276)

Adam Watanyna ynanmaly

Men türkmeniň ruhy dünýäsi barada aýdanymda, elmydama onuň ýüreginiň — göwnüniň galkynyp durmagy, adamyň dünýäde hemişe umyt bilen ýaşamagy, şol umydyna-da ýetjegini bilmegi, Watanyna, halkyna, adalata ynanmagy, özüniň isleginiň-arzuwynyň kanagatlandyryljakdygyny bilmegi barada aýdýaryn.

(288)

Öz öýkäň bilen Watanyň, Garaşsyzlygyň beýikligini ölçeme!

Şu günler hem: «Aý, SSSR döwri gowudy» diýjek bolýan adamlar bar. Eziz türkmenim, ýalňyşmaň, öz öýkäň bilen Watanyň, Garaşsyzlygyň beýikligini ölçeme! Ol gymmatlyklaryň bahasyna ýetme ýokdur.

(296)

Ajaýyp Watany, ene topragy, keremli ýurduňyzy söýüň!

Ine, şonda, diňe şonda ruhuňyz belent bolar, işiňiz oň bolar!

(304)

Ruhubelent adamyň ýüreginiň örki eziz Watanydyr

Ruhy hyjuw hem adamyň, ilkinji nobatda, öz halky, Watany bilen ýüreginiň birliginden joş alýar. Ýürek birligi, özüňi, ýüregiňi iliňden-günüňden aýra tutmazlyk — söýgüdir. Ruhubelent adamyň ýüreginiň örki, bagrynyň bagy onuň eziz Watanydyr.

(309)

Watan düşünjesi giňdir hem-de çuňňurdyr

Watan düşünjesi giňdir hem-de çuňňurdyr, juda köp zatlary we manylary öz içine alýandyr. Aýal, çaga, dogan, garyndaş, döwlet, dost-ýar, dogduk mekan, işdeşler, geçmiş hem şu gün — şular bir ýeke-täk düşünje — Watan diýen gymmatlyk bilen aňladylýar. 

(309)

Watan — ýeke-täkdir

Adamzat ruh we ruhyýet baradaky pikirlerinde kämillige ýetende, Ýaradanyň ýeke-täkligi hakyndaky taglymaty — Ýekehudaýlylygy döredipdir. Şonuň ýaly, aýratyn adam hem özüne gymmatly zatlary umumylaşdyryp hem-de şahsyýetleşdirip, olary Watan diýen bir söz bilen aňladýar. Watan — ýeke-täkdir. Ýeke-täkligiň manysy bolsa ýeg diýmekdir, eziz diýmekdir.

(309)

Watan ezizligine göz ýetiren türkmen hiç mahal ruhdan düşmez

Aňy hem köňli bilen Watan ezizligine göz ýetiren türkmen hiç mahal ruhdan düşmez. Çünki onuň üçin Watan paýhasda delile, ýürekde mähire, ahlakda sarsmaz ynanja, işde armaça, hereketde berekete öwrüler.

(309)

Ömür tejribäm Watanyň nämedigini özgelere öwretmäge maňa hukuk berdi

Meniň ata-enem hem, hossarym hem Alla, soňam eziz halkym boldy. Indi bolsa horlukdan doly şu geçen ýolum, özgeleriňkiden tapawutlanýan ömür tejribäm nämäniň nämedigini, ata-enäniň, Watanyň nämedigini özgelere öwretmäge maňa hukuk berdi.

(314)

Watan seniň ömürlik galaňdyr

Ömür diýilýän zat üç sany galada geçýändir. Ol galalaryň biri ömürlik, galan ikisi wagt taýdan biri-biriniň yzyndan gelýändir. Ömürlik gala diýýänim — seniň Watanyňdyr, doglanyňdan tä Allanyň beren soňky gününe çenli sen şonuň içindesiň.

(314-315)

Watanyňdan aýra düşmek iň agyr dert

Ýesir bolmak öz Watanyňdan aýra düşmek hem-de her hili jebir-sütemlere sezewar bolmakdyr. Ýesir töweregindäkileriň maddy hemaýat bermeýänliginden däl-de, olaryň ruhy biperwaýlygyndan, doňbagyrlygyndan ejir çekýär. Dünýäniň özi onuň gözlerine adam sypatlaryndan mahrum zulum bolup görünýär.

(320)

Adamyň ilkinji Watany ene rehmi

Adamyň ilkinji Watany-da enedir.          

Adamyň dokuz aýlap ýaşaýan, adam bolup kemala gelýän ilkinji Watany ene rehmidir.

(320)

Enäniň ýyly gujagy – ikinji Watan

Adamyň bäbeklikden çagalyga çenli ýaşaýan, dil çykarýan, aňyny we duýgularyny kemal edýän ikinji Watany enäniň ýyly gujagydyr. Ene gujagynyň ýylylygyndan hem mähir kemala gelýär.

(321)

Adamyň çagalykdan oglanlyga çenli ýaşaýan, onuň iň gözel häsiýetlerini kemal edýän Watany enäniň mährem elleriniň aýasydyr. Ene elleri başyny sypan adam, biziň hemmämiziň umumy gujagymyz bolan Watanyň ýaşaýjysyna öwrülmäge taýýar şahsyýet bolup ýetişýär.

(321)

Ene toprak, Ata watan diýýäris

Ene toprak, Ata watan diýýäris. Ene bize topragy söýmegi, ata bize Watany söýmegi gan, ruh bilen bagyş edendir.

(325)

Watan unudýan däldir

Watana dirikäň eden hyzmatlaryň ýogalanyňdan soň hem peýdaly boljakdyr. Watan unudýan däldir, Watanyň saklanyp duranlygynyň özi-de, onuň unutmaýanlygyndadyr.

(336)

Ata Watany goramak seniň mukaddes borjuňdyr

Ata Watany, ene topragy jandan söýmek we onuň Garaşsyzlygyny gözüň göreji deýin goramak seniň mukaddes borjuňdyr.

(336)

Watan duzy — mukaddesdir, keramatdyr

Watanyň duzuna, asly halal ene süýdüne wepaly bol! Çünki Watan duzy we ene süýdi — mukaddesdir, keramatdyr.

(336)

Seniň bilimli, ylymly, hünärli bolmagyň kuwwatly Watan üçin gerek

Eziz oglum, mähriban gyzym! Oka! Öwren! Döret! Seniň bilimli, ylymly, hünärli bolmagyň kuwwatly Watan üçin, Garaşsyz diýar, gahryman halkyň üçin zerur gerekdir.

(337)

Halal rysk, halal döwlet adamyň ýüregini öňküdenem arassalaýar. Çünki ol adam özüni juda arkaly duýýar. Onuň hiç kimiň öňünde — Allanyň öňünde-de, Watanyň öňünde-de, milletiň öňünde-de müýni ýok. Bu ruhy azatlykdyr.

(369)

Pyragy, watan diýp gan döker gözüm, baky garap durmuş hijrana ýüzüm... Mert ýigit mert ärden öner, namart asyl-ha, mert bolmaz, eşit adam dogan ilden gaýry mähriban ýurt bolmaz!.. Ýat illerde mysapyrlyk çekenden, ursa, sökse, horlasa-da il ýagşy... Gel köňlüm, men saňa nesihat bereý, Watany terk edip gidiji bolma... Din gylyjyn çalsam, tende zorum ýok, mätäje nan bersem, elde zerim ýok, pakyr menem, senden aýra ýerim ýok...»

(377)

Watana wepaly boluň!

Eziz türkmenim, dokuz ýüz ýyl mundan ozal ata-babalarymyzyň ýolbaşçy saýlaýşy, ýolbaşçylaryň wezipesini ýerine ýetirişi hakda şu permanlardan özüňiz many çykararsyňyz, Watana wepaly bolarsyňyz diýip pikir edýärin.

(398)

Zähmet çekeliň — öz Watanymyzyň, öz topragymyzyň hatyrasyna zähmet çekýändiris. 

(403-404)

Uly-uly döwletler gurup, aga-ýana döwran süren ata-babalarymyzyň haky üçin, Watan ugrunda başyny goýan ärleriň, şirleriň, gerçekleriň haky üçin döwletimizi — Garaşsyz, baky Bitarap Türkmenistany kuwwatly, beýik döwlete öwreliň!

(404)

Bu toprak keramatlydyr, bu Watan mukaddesdir!

Ata-babalarymyzyň gyrmyzy gany, enelerimiziň ganly gözýaşy dökülen topragy abadan ýurt edip, mähriň, gülküniň, şadyýanlygyň, bagtyň mesgenine öwreliň, çünki bu toprak keramatlydyr, çünki bu Watan mukaddesdir!

(404)