Özümiziň döwlet dolandyryş ýolumyzy türkmen ýoly diýip atlandyrýarys

Şu günki türkmen jemgyýetiniň, ykdysadyýetiniň, syýasatynyň, aňyýetiniň altyn sapaklary bilen çitim-çitim edip döwlet gurýarys. Özümiziň şu döwlet dolandyryş ýolumyzy türkmen ýoly diýip atlandyrýarys. Bu türkmen döwletiniň bähbidi — halkyň bähbidi. Syýasat, ykdysadyýet düzülende diňe ähli halkyň bähbidi göz öňünde tutulmalydyr.

(250)

Hiç bir döwlet, millet başga döwletiň, milletiň ýoluny gaýtalamaýar

Hiç bir döwlete, halka öýkünmän, diňe öz ýolumyz bilen gitjekdigimizi biz hiç kimden gizlemedik. Her bir kişi ikinji biriniň, hiç bir döwlet, millet başga döwletiň, milletiň ýoluny gaýtalamaýar. Ýollar meňzeş bolup biler, jemgyýetiň ösüşiniň ýa yza gaýdyşynyň adam aňyna, erkine bagly bolmadyk umumylyklar hem bolmagy mümkin.

(251)

Türkmen halkynyň Nuh alaýhyssalamdan gaýdýan uly taryhy ýoly bar.

(9)

Beýik Allatagala bizi Adam edip ýaratdy, biz adam bolup dünýä indik, indi ajaýyp bir jemgyýet gurup, eşretli döwran sürüp, her bir ildeşimiziň ýagşyzadalaşmagyna ýol açmak biziň mukaddes borjumyz!

(28)

Türkmeniň ýoly arassa ýoldur.

(59)

Biziň ýolumyz gadymy türkmen ýoly! Biziň ýolumyz Oguz hanyň pygamber ýoly!

Biziň ýolumyz adalat ýoly.

Biziň ýolumyz abadanlyk ýoly.

Biziň ýolumyz agzybirlik ýoly.

Biziň ýolumyz dostluk-doganlyk ýoly.

Biziň ýolumyz azat wyždan ýoly.

Biziň ýolumyz azat zähmet ýoly.

Biziň ýolumyz milli bitewilik ýoly.

Biz başga hili ýol bilen gidip hem bilmeris, hiç bir türkmenem gitmesin, çünki biziň Garaşsyz Türkmenistan döwletimiz — halk döwletidir.

Halkyň ýoly — Hakyň ýoly.

(60)

Türkmen ýoly taryhda gahrymançylykly ýoldur. Biz ata-babalarymyzdan miras galan şanly türkmen ýolumyza guwanmaga, buýsanmaga doly haklydyrys. Bu ýol Garaşsyzlygymyzy we baky Bitaraplygymyzy almagymyz bilen bakyýete öwrülen altyn ýoldur.

Türkmeniň geçen şanly ýoly her bir raýatymyzy ruhlandyrýan öçmejek ýoldur.

Bize ata-babalarymyzdan miras galan bu türkmen ýoly mukaddesdir, ezizdir. Ata-babalarymyz ençe müňýyllyklaryň dowamynda türkmen bolup ýaşadylar, türkmen ýoluny mukaddes tutdular, mukaddes sakladylar. Türkmen ýoluny müňýyllyklaryň güýçli darkaşlaryndan şu güne ýetirmek olara aňsat düşmedi. Güýç-gaýratdan, sahawatdan, rysgal-bereketden, söýgüden bina bolan türkmen ili, türkmen ýoly syrly gudrat bolup türkmeniň kalbynyň töründe ýaşaýar.

(78)

Oguz hanyň taglymaty halkyň hakydasynda Oguz hanyň ýoly bolup galypdyr.

Gorkut ata taglymaty halkyň hakydasynda Gorkut ata ýoly bolup galypdyr.

Görogly begiň taglymaty halkyň hakydasynda Görogly ýoly;

Magtymguly atamyzyň taglymaty halkyň hakydasynda Magtymguly ýoly bolup galypdyr.

(164)

Garaşsyz,baky Bitaraplyk ýolumyz türkmen milletimiziň mähir-muhabbetinden, arzuw-telwasyndan, asylly maksatlaryndan dörän, Altyn asyrda altyn ruhda, altyn ýaşaýyşda ýaşadýan ýoldur. Bu ýol türkmeniň bakylyk-dowamat ýoludyr.

(164)

Türkmende ýol sözüniň manysy kän.

Dünýäde ýol goýanlar taryha girýär, ýol ýitirenler il içinde hem näletlenýär.

Gyş. Agyr gar güpüläp düşýär. Irden turan öý eýesi ilki goňşusynyň mellegine çenli gary ardyp, ýol çeker. Soňra ojagydyr, tamdyryna çenli...

Ýollaryň ýagşysy hassa kişini soramaga alyp barýan ýoldur. Pygamberimiz aýtmyşlaýyn, hassa soramaga barýan wagtyň ömrüň umumy hasabyna urulmaýar.

(165)

Ýollaryň ýagşysy — ynsan kalbyna barýan ýoldur.

Ýollaryň ýagşysy — adalat, dostluk, doganlyk, parahatlyk ýoludyr.

Ýollaryň ýagşysy — halkyň ýoludyr.

Halkyň ýoly — Hakyň ýoludyr!

(165)

Ata-babalarymyz türkmen ýoluny mukaddes tutmagy wesýet edipdirler

Oguz han Türkmenden, Gorkut atadan, Görogludan, Magtymguly atamyzdan bize türkmen ýoluny mukaddes tutmak wesýeti, türkmen milletiniň jebisligi, bitewiligi barada ençeme öwüt-ündewler galypdyr. Ol öwüt-ündewlere gulak assaň, milletiňe buýsanç, guwanç duýgusy kalbyňa dolýar.

(165)

Türkmen ýoly şeýle beýik ýoldur. Bu beýik ýolda bize uly-uly altyn işleri bitirmek bagty garaşýar, eziz türkmen halkym!

(102)

Türkmenistan ata-baba ýoly bilen barýar

Türkmenistan ata-baba ýoly bilen barýar, nesip bolsa, siziň her biriňiz düýpli, döwletli baý bolarsyňyz, ýöne siz şol baýlyga mynasyp boljak boluň. Hakyky baýyň, öňi bilen, ruhy baý bolýandyr. Maddy baýlyk bilen ruhy baýlyk sazlaşanda altyn ýaşaýyş dörär.

(192)

Taryhdan gelýän düşünişmek ýolumyz bar

Men Birleşen Milletler Guramasynyň döredileniniň 50 ýyllyk dabarasynda hemişelik Bitaraplyk şygarymyzy dünýä yglan edenimde, oguzlaryň-türkmenleriň, seljuklaryň ýaýran sebitindäki medeniýetlerde miras paýymyzyň bardygyny ýöne ýere aýtmadym. Häzirki zamanda bu biziň biri-birimize taryhdan gelýän düşünişmek ýolumyzyň gowy nusgasy bolup hyzmat edýär.

(243)

Ähli döwletler biziň ýolumyzyň dogrudygyny aýdýarlar

Ilki bilen sebitdäki goňşy döwletlerimizden başlap, dünýädäki ähli döwletler biziň ýolumyzyň dogrudygyny aýdyp, bizi goldap başladylar.

(244)

Ýollarymyz taryhdan gelýär

Ýollarymyzyň taryhdan gelýändigini ýene ýatlaýaryn. Biziň atalarymyzyň dünýäniň çar tarapyna göç ýollarynyň bolandygy hakykatdyr. Biziň indi dünýädäki döwletleriň, halklaryň ýüregine barýan parahatlyk ýolumyz bilen birlikde ykdysady ýollarymyzyň bardygy bellidir. Ýollarymyz ýene gadymky güzerlerinden gitse-de, maksadymyz dünýä döwletleriniň ýüregine ýylylyk getirmek, ýagty getirmek, ýagny tebigy gazymyz bilen halklaryň bereket ojagyna barmak.

(245)

Ata-babalarymyzyň ýoluny tutup döwletimizi bina etdik

Garaşsyz, baky Bitarap Türkmenistan döwleti, sen keramatly bolmalysyň, çünki biz keramata öwrülip giden ata-babalarymyzyň ýoluny tutup, seni bina etdik.

(253)

Türkmenistanyň syýasy häsiýetiniň pikiri, ynha, şeýledir, ony bolsa täze asyrda we müňýyllykda öz ösüşiniň ýoly kesgitlär. XXI asyry XX asyra garanyňda has howpsuz, has adalatly, has bagtly, agzybir etmek üçin türkmenistanlylar ähli güýçlerini bir ýere jemläp, şu ýüzýyllygy türkmen halkynyň taryhynda Altyn asyra öwrerler.

(285)

Türkmeniň bäş eýýamynda köp hem dürli ýol-ýörelgeler ýüze çykdy we durmuşa ukyplylygyny görkezdi. Hut şol ýollar bilen gidip, türkmen türkmenligini görkezdi. Türkmeniň ýoly belentlikden belentliklere barýan ýoldur. Iň täze eýýam ýoly türkmen milletini hem, türkmen şahsyýetini hem bitewileşdirdi. Şonuň üçin hem biziň ýolumyz — bitewilik ýoludyr.

Türkmene iň täze eýýamda milleti maddy we ruhy taýdan dargatman, bir bitewilikde saklap duran özüne çekiji güýç gerek. Ol güýjüň ornuny häzir diňe döwlet we onuň milli ýörelgeleri tutup biler.

Adamdan ýalňyz bir ýadygärlik galýar, ol hem onuň bitiren işleridir. Durmuşda eýeleýän ornumyz, wezipämiz däl-de, barýan ýolumyz möhümdir.

Saýlap alan altyn ýolumyzda özümizden soňkulara beýik ýadygärlik galdyrmak her birimiziň gursagymyzda bolmalydyr, şol mukaddes maksat bilen işlemelidiris, ýaşamalydyrys, döretmelidiris.

(401)

Meniň ýolum özen ýoludyr — ruhyýeti düzgünleşdirmek ýoludyr.

Düzgünleşdirmek — başyna goýbermän «näme bolsaň, şo bol» etmän, dargatman saklamakdyr.

Meniň ýolum — ruhanalyk ýoludyr.

Meniň ýolum — taryhyň erkini milletiň eline bermek ýoludyr.

Meniň ýolum — geljegi milletiň aňyýetine we ruhyýetine baglap goýmak ýoludyr.

(402)

Meniň ýolum — öňki ýollardan tapawutlylykda, diňe geçmişi we şu güni däl, eýsem geljegi-de aňa we ele getirmek ýoludyr.

(402)

Geçmişden garap duran pygamber atamyz Oguz han tanyg bolsun, meniň saýlan ýolum adalat ýoludyr!

Asmandan nurly şuglasyny saçyp duran Gün han atamyz tanyg bolsun, meniň ýolum nurana hakykat ýoludyr!

Arly gije kümüş şuglasyny saçyp duran Aý han atam tanyg bolsun, türkmeniň tutan ýoly aýdyň ýoldur!

Türkmenistanyň dört tarapyndan garap duran atamyz Ýyldyz han tanyg bolsun, biziň tutan ýolumyz pygamberler ýoludyr!

(405)

Ruhnama biziň ýolumyzdyr! Ruhnamany okan her bir türkmen özüne akyl ýetirer. Ruhnamany okan her bir başga milletiň, ýurduň wekilleri türkmeni tanap bilerler!

(406)

Ýollaryňyz aýdyň, erteleriňiz ýalkymly, geljegiňiz şuglaly, eýýamyňyz altyn bolsun, gadymy hem müdimi türkmenim!

(406)