(18)

Aslynda taryhy dowamatda şahsyýet bilen jemgyýetiň özara täsiriniň kanunalaýyklygy şeýledir: taryhyň bir döwründe jemgyýetde ýygnanan gujur indiki bir döwürde milletiň kemala getiren şahsyýetinde tebigy suratda döremelidir, özem şol ýerde doňup galmak üçin ýa-da ýitip gitmek üçin däl-de, taryhy hereketiň üçünji nokadynda täze hilde milletiň özüne gaýdyp gelmek we ony täze belentliklere galdyrmak üçin döremelidir.

(19)

Her bir şahsyýeti onuň mazmunyny düzýän hemrasy bilen bilelikde göz öňüne getirýärler: Serkerde eli ýaragly, şahyr eli galamly, tebip bolsa eli dermanly bolýar. Döwlet baştutany, taryhy şahsyýet öz taglymatyny döredip, öňe çykýar.

(19)

Güýjüni, gaýratyny, söýgüsini, yhlasyny, ömrüni lükgeligi bilen orta goýup bilýän halkymyz barka, bu toprakda jenneti döredip, ajaýyp altyn jemgyýeti gurup bilmesek — bizden aýyp bolar!

(28)

Beýik Allatagala bizi Adam edip ýaratdy, biz adam bolup dünýä indik, indi ajaýyp bir jemgyýet gurup, eşretli döwran sürüp, her bir ildeşimiziň ýagşyzadalaşmagyna ýol açmak biziň mukaddes borjumyz!

(28)

Şahsyýetiň baş sypaty kämillikdir

Altyn asyrda biziň millet hökmündäki ösüşimiz altyn şahsyýetiň sypatlaryny kemala getirýär. Millet ýokary galdygyça, şahsyýet hem barha kämilleşer. Onuň baş sypaty hem kämillikdir. Türkmen şahsyýetiniň beden we ruhy kämilligi biziň ösüşimiziň ölçeg daşy bolar. Biz jemgyýetde kämil şahsyýetiň kemala gelmegi üçin döwletiň elinden gelýän ähli şertleri döretdik.

(201)

Şahsyýet milletden gözbaş alýar

Şahsyýet milletden gözbaş alýar. Bu ikisiniň asly we durky birdir. Şonuň üçin hem her bir şahsyýet özüniň ruhy-ahlak sypatynyň milletiň ruhy-ahlak sypatynyň çäginde bolmagy barada aladalanmalydyr. Şahsyýet üçin milletden gaýry uly gymmatlyk, milletden eziz zat ýokdur. Türkmen şahsyýetiniň ýüregi öz milleti bilen bir bolmalydyr, onuň ýüregi milletinden aýry bolmaly däldir. Türkmene Altyn asyrda Watan diýip urýan ýürekler, Watan üçin diýip işleýän akyllar gerek. Watan hem millet her bir şahsyýetiň dilinde dogasy, işlerinde itergisi bolmalydyr.

(201)

Türkmen şahsyýeti öz mazmunyny milli gymmatlyklar bilen doldurmaly

Sowet agalygynyň döwründe ruhy dünýäsi boş galan türkmen — ata-babalaryndan arasy üzülip, öz aslyny unudan türkmen indi öz şahsyýetiniň mazmunyny milli gymmatlyklar bilen doldurmalydyr. 

(202-203)

Şahsyýetiň kysymyny milli ölçegler kesgitlemelidir

Şahsyýetiň köňlünde esasy duýgy milli buýsanç duýgusy, şahsyýetiň aňynda baş pikir dünýäni türkmençe görüş pikiri, şahsyýetiň ahlagynda baş gymmatlyk türkmen ahlaklylygy, şahsyýetiň gylyk-häsiýetinde milli häsiýetler, şahsyýetiň ruhy ynançlarynda baş ynanç türkmen halk ynançlary bolmalydyr. Bir söz bilen aýdanyňda, şahsyýetiň kysymyny milli ölçegler kesgitlemelidir. Häzirki taryhy pursatda başgaça bolup bilmez. Çünki indiden beýläk biz diňe millet bolup ömrümizi dowam etdirip bileris.

(203)

Şahsyýetiň aňynda milli gymmatlyklar birinji orunda bolmalydyr

Türkmen altyn şahsyýetiniň aňynda umumymilli duýgular we umumymilli gymmatlyklar esasy, birinji orunda bolmalydyr, taýpa-tire degişliligi bolsa Altyn asyrda aramyzdan ýok edilmelidir.

(203-204)

Millet — bakydyr, tire-taýpa — wagtlaýyndyr. Millet — bakylykdyr, tire-taýpa — wagtlaýynlyk, ötegçilikdir. Türkmen şahsyýeti şu pelsepeden ugur almalydyr. Diriligiň çynlygy diriligiňi aňlap bilşiňe-de baglydyr. Biz öz türkmenligimizi näçe çuňňur, näçe düýpli aňlasak, şonça-da türkmenligimiz berkär. Aňlaýyş işi bolsa şahsyýetler bolup amala aşyrylýar. XXI asyrda türkmen milleti özüniň öňe çykaran şahsyýet kysymy bilen güýçli bolar.

(204)

Maksada okgunly şahsyýetler zerur

Altyn asyryň altyn şahsyýeti maksatly we maksada okgunly şahsyýet bolmalydyr. Biz millet derejesinde beýik taryhy maksatlary öňümizde goýduk hem-de kanagat we aýgytlylyk bile şol maksatlarymyza tarap barýarys. Her bir türkmen şahsyýetiniň şol taryhy maksatlary amal etmekde paýyna düşýän zatlar bar. Hut şol paýy hem şahsyýet öz hususy maksady hökmünde aňlamalydyr.

(204)

Biribara yssy görnen dinimizi, ynanjymyzy, milli häsiýetlerimizi, milli däp-dessurlarymyzy gorap saklamakda we olary ýoýmazdan täze taryhy eýýama geçirmekde türkmen şahsyýetiniň üstüne uly borçlar düşýär.

(206)

Altyn asyrda hem ata-babalarymyz ýaly durnukly şahsyýetler bolmalydyrys. Durnukly, durumly, görümli, asylly, arkaly, göwni giň şahsyýetler bolmalydyrys.

(206)

Biz adama garaw bolsun diýip milli döwleti gurduk. Türkmen ili, türkmen milleti, türkmen döwleti her bir türkmen şahsyýetiniň abadançylygyna, adam şekilli ýaşaýşyna kepil geçýär.

(207)

Akyl, duýgy, häsiýet, ahlak — bularyň bary Altyn asyryň türkmen şahsyýetinde şahsyýet bütewiligini kemala getiriji taraplar bolmaly. Türkmen şahsyýetiniň altyn sypatlary XXI asyrda göreniň göwnüni galkyndyrýan, biçak ýakymly täsirler galdyrýan, eziz bolmalydyr.

(208)