«Ruhuňyz belent bolsun. Şadyýan boluň. Ruhubelentlik ömrüňize nur-many çaýar, kyn işiňizi aňsat eder» diýip, Nuh alaýhyssalam öwredýärdi.

Men siziň Jebislikde, Agzybirlikde, Abadançylykda, Ruhubelentlikde ýaşamagyňyzy isleýärin.

Türkmen ruhubelentligi dünýä nusga häsiýetdir. Ruhubelentligiň hemişe-de gerek. Emma taryhyň gözükmeleri üýtgäp, ýönekeý adamlaryň özlerini garawsyz galan ýaly duýýan taryhy pursatlarynda ruhubelentlik has hem zerurdyr. Ruhubelentligiň manysy göwnüçökgünlikden, tukatlykdan hem-de gam-gussadan daşda durmakdyr. Adam öz ýekeligi boýunça garawa mätäç jandardyr. Şu manyda ulular hem özboluşly çagalardyr. Dürli taryhy döwürlerde adam özüne garaw berjek güýjüň keşbini döredipdir. Biziň döwrümiz üçin kynçylyk, göwnüçökgünlik ýatdyr. Emma garaw taryhyň imi-sala, aram pursatlarynda hem zerurdyr. Ony adamyň zandy, tebigaty talap edýär.

Biz adama garaw bolsun diýip milli döwleti gurduk. Türkmen ili, türkmen milleti, türkmen döwleti her bir türkmen şahsyýetiniň abadançylygyna, adam şekilli ýaşaýşyna kepil geçýär.

Emma ruhubelentlik diňe daşky esaslarda döremeýär. Onuň üçin içki esaslar hem zerurdyr, hatda daşkydan hem zerurdyr. Munuň üçin şahsyýetiň öz-özüni aňlamagy, öz gymmatyna akyl ýetirmegi gerek. Göwni giňlik — ruhubelentligiň esasydyr. Sabyr-kanagat — göwni giňligiň doganydyr.

Bu zatlary gymmatlyklar hökmünde ykrar etmek üçin akyl-paýhas gerek. Ýüregiň, kalbyň gözüni açmazdan owal paýhasyň gözüni açmaly. Akyl aňlanylýan we aňlanylmaýan dertleriň baryndan halas edýändir.

Akyldan kösenen bardyr, akyldan zyýan çeken ýokdur.

Akyl, duýgy, häsiýet, ahlak — bularyň bary Altyn asyryň türkmen şahsyýetinde şahsyýet bütewiligini kemala getiriji taraplar bolmaly. Türkmen şahsyýetiniň altyn sypatlary XXI asyrda göreniň göwnüni galkyndyrýan, biçak ýakymly täsirler galdyrýan, eziz bolmalydyr.

Ruhuňyz belent bolsun!

Allatagala adamy döredende oňa ten beripdir, ruh beripdir. Adamyň ruhy belent bolanda, her adamyň ruhy jemlenip, halkyň ruhuny emele getirýär. Her adamyň ruhy belent bolanda, halkyň ruhy belent bolýar.

Biz, türkmenler dünýä ýüzüne öz taglymatymyz bilen çykýarys: biziň taglymatymyz — ruhubelent ýaşamak.

Ruhuňyz belent bolsun! Ruhy belent adamy Allatagala ýalkarmyş, ryskyny iki esse berermiş. Ömrüni iki esse berermiş.

Ýanyňyza gamgyn adam gelip, dünýäden, durmuşdan, adamlardan zeýrenip gitse, onuň gussasynyň ruhy sizde galar, edip oturan işiňizdenem eliňiz sowar. Tersine, şadyýan, ruhubelent adam myhman bolsa, ol bütinleý ruhuňyzy täzelär, ozal höwessiz edýän işiňizi hem ýaňadan höwes bilen başlarsyňyz. Ruhubelentlikde tükeniksiz güýç bar. Türkmen, ana, şol tükeniksiz güýje eýe bolmalydyr.

Ýaşaýyş — ýaryşdyr. Ýagşy adam bilen ýaryşsaň, ýagşy bolarsyň. Ýagşylyk, ýagşy kişiler ýaranyňyz bolsun!

Alla ruhubelentleri söýýändir, ýalkaýandyr, olara buýsanýandyr. Siziň özüňiz hem ogullaryňyzyň içinde şahandaz, şähdaçyk, durmuşa söýgüden dolup-daşyp ýören ogluňyzy has gowy görýänsiňiz.

Entek zeýrenip gala alan, iş bitiren ýokdur. Gam-gussa dartanyň bilen gam-gussa aýrylyp gidýän däldir, tersine, gam-gussa köňül berseň, ol goş basyp, duluňda ýatar.

Ruhuňyz beýik bolsun! Ruh ynsan göwresine Allatagalanyň salan jan guşudyr, mübärek demidir, päkize, keremli nepesidir. Allatagala ony dabaraly ýaşaýyşda tug ýaly pasyrdadyp, hoş bolup, keýp bilen ýaşarsyňyz diýip berendir.

Ýaşaýan wagtyňyz ruhuňyzy beýikde tutuň, goý, ol siziň şahsy tuguňyz ýaly al-asmanda pasyrdap, ganat kaksyn! Ahyry ýene Allatagala öwrülip barjak ruhuňyzdyr. Onuň dergähine göýdük, gamgyn, para-para bolan perişan ruhly baryp bolmaz! Ýaşaýşy, durmuşy, bala-çagalaryňyzy söýüň!

Ajaýyp Watany, ene topragy, keremli ýurduňyzy söýüň!

Ine, şonda, diňe şonda ruhuňyz belent bolar, işiňiz oň bolar!