Moskwanyň Lomonosow adyndaky döwlet üniwersitetiniň prorektory, Ylmy we işjeň hyzmatdaşlyklaryň halkara fondunyň wise-prezidenti Grigoriý Stepanowiç SOBOLEW:

„Ajaýyp filosofiki iş bolan Ruhnama ýurtlaryň we halklaryň arasyndaky dostlugy goramagyň, dikeltmegiň ýollaryny örän düşnükli, sada dilde we ynamly görkezýär. Ähli beýik işler hemişe sada bolýar. Edil şonuň ýaly-da ol örän çuňňur filosofiýa, pähim-parasata baýdyr. Ruhnamadaky şu hili sözleri häli-şindi gaýtalasyň gelýär: „Dünýäniň ýoly hakykata, adalata, parahatlyga, erkin zähmete barýar. Adamzadyň mazmuny döretmekden, ýaratmakdan, agtarmakdan, gözlemekden, gurmakdan ybaratdyr“.

“Öz halkynyň hakyky ynamyna giren Saparmyrat Nyýazow il-gününe öz kalbynyň töründen çykýan sözler bilen ýüzlendi. Munuň özi türkmenler özüniň berk taryhyna täzeden ýüzlenen, millet hökmünde galkynýan wagtynda örän möhümdir. Şunda Saparmyrat Türkmenbaşynyň hyzmaty diýseň uludyr. Gös-göni kitap hakynda aýdanyňda bolsa, ol içinde jemlenen pähim-paýhaslar bilen özüne çekýär. Ol öz wagtynda ýazylan kitap. Bu kitabyň ömrüniň uzak boljakdygyna we türkmenleriň ählisi üçin mukaddes Kitaba öwrüljekdigine ynanýaryn. Ol watansöýüjiligiň beýik nusgasydyr. Baýry ýazyjy hökmünde Saparmyrat Nyýazowy mukaddes kitaby bilen, onuň türkmen halkynyň täze galkynyşynyň taryhyna goşan uly goşandy bilen gutlaýmak galýar”

“Bu kitapda, gürrüňsiz, türkmen halkynyň taryhy we medeni mirasy beýan edilýär, onda jemgyýetiň ruhy galkynyşynyň we Garaşsyz, Bitarap Türkmenistanyň gülläp ösmeginiň esaslary goýlandyr. Ol gülläp ösýän we güýçli döwleti döretmäge ýardam eder. Sebäbi rus dilinde çykan Ruhnama kitabynyň tanyşdyrylyşy Sankt-Peterburgyň gubernatory W. Ýakowlewiň Türkmenistana resmi saparynyň öň ýanynda geçýär. Şol saparyň dowamynda özara hyzmatdaşlyk etmek baradaky Ylalaşyga gol çekmek göz öňünde tutulýar. Newanyň kenaryndaky şäheriň medeni, ylmy, tehniki we ykdysady mümkinçilikleri Saparmyrat Nyýazowyň Türkmenistanyň ýokary derejede ösen döwlet bolmagy, onuň raýatlarynyň öz Watanyna buýsanmagy we öz taryhy köklerini oňat bilmegi baradaky arzuw-islegleriniň hasyl bolmagyna ýardam eder diýip ynanýaryn”.

Ýazyjylar Birleşikleriniň Halkara Jemgyýetçiliginiň müdiriýetiniň başlygynyň orunbasary, öz wagtynda “Seýdi” poemasyny ýazan ýazyjy W. SOROKIN:

“Ruhnamany şahyr Prezident ýazdy, şonuň üçin hem ol şahyrana mähre eýelenendir, öz halkyna, öz topragyna bolan beýik söýgä beslenendir”.

Russiýanyň Döwlet dumasynyň deputaty A. MITROFANOW:

“Men hem öz deputat-kärdeşlerim ýaly, Türkmenistanyň baştutanynyň kitabynyň tanyşdyrylyş dabarasyna gatnaşýandygyma örän şat. Şu dünýäde Garaşsyz bolmak örän kyn zat, munuň şeýledigini her ýyl, her gün görkezýär. Munuň özi uly ýurtlara hem, kiçi ýurtlara hem, aýratyn hem öz ýoluny golaýda saýlap alan ýurtlar üçin kyn iş. Türkmenistanyň Saparmyrat Türkmenbaşynyň ýolbaşçylygy astynda ýöredýän daşary syýasaty has özüne çekýär. Biz şu ýerde garaşsyz we özbaşdak döwlet gurmagyň hakyky nusgasyny görýäris. Hakyky watançy üçin şunuň ýaly mysallar diýseň özüne çekijidir. Uly ýa-da kiçiligine garamazdan, hiç bir döwlet hem öz ýörelgelerini beýleki halklaryň boýnuna dakyp bilmez. Her kim öz ýoluny özi saýlaýar we öz il-güni bilen ýaşaýar.

Men Ruhnama kitabyny birnäçe aý mundan ozal okadym. Bu kitapdaky käbir jümleler meniň maşgalamda örän ýörgünli boldy. Mysal üçin, Saparmyrat Nyýazowyň eserindäki “Aglasa enem aglar, galany ýalan aglar” diýen jümläni görkezmek bolar. Men bu ajaýyp kitaby russiýalylaryň okamagyny tüýs ýürekden maslahat berýärin”.

Russiýanyň Tebigat ylymlary akademiýasynyň akademigi W. ŞEREMET:

“Bu kitap uly açyşlar. Biz köp babatda türkmenleriň syrly dünýäsini açýarys. Biz, gündogary öwerenijiler, bu halka öňden bäri uly hormat goýýarys, ýöne biziň köpimiz üçin bu kitap hakykatdan-da açyş, halkyň taryhyna, onuň ruhy gymmatlyklaryna, ahlak gözelligine täzeçe garaýyş bolar. Ýeri gelende aýtsak, bu kitaba Saparmyrat Türkmenbaşy tutuş ömrüni bagyşlady.

Bu adamda tebigy ylmy, taryhy we ruhy başlangyçlar birigipdir, onuň uly hyzmaty hem şundadyr. Bu adam öz ýurdunyň alymy, şahyry we beýik raýatydyr. Ol ilkinji nobatda bitaraplyk ugruny ýöredýänligi üçin, öz ýurduna, öz halkyna, tutuş ýer ýüzündäki adamlara bolan söýgüsi üçin iň uly sylaglara mynasypdyr.

21-nji asyryň halklary ýarag bilen, tanklar we uçarlar bilen güýçli däldir. Meniň pikirimçe, täze asyryň halklary özleriniň kalplaryndaky ruhy medeniýeti bilen, ata-babalarynyň ýörelgelerine ygrarlylygy bilen güýçlüdir”.

Gündogar halklarynyň sungaty baradaky döwlet muzeýiniň baş ylmy işgäri, taryh ylymlarynyň doktory S. BERZINA:

“Biz bu gün türkmen baştutanynyň kitabynyň çapdan çykmagy bilen gutlaýarys. Bu kitabyň köp taraplaýyn uly ähmiýeti bardyr we ol diňe türkmen halkynyň taryhyna we ykbalyna degişli bolmak bilen çäklenmeýär. Mukaddes Ruhnama tutuş Merkezi Aziýanyň taryhy geçmişine we häzirki ýagdaýyna göz ýetirmekde örän möhüm ähmiýete eýedir”.

Russiýanyň ylymlar akademiýasynyň Etnologiýa institutynyň professory N. DUBOWA:

“Ruhnama türkmen halkynyň agzybirliginiň pugtalanmagyna ýardam edýär, eger her bir ýurtda şunuň ýaly kitap bolan bolsa, örän ajap bolardy”.