Perzent ata-enä baglydyr
Perzendiň borçlulygy ata-enäniň perzent üçin eden we edýän hossarlygyndan gelip çykýar. Perzent gaty köp meselelerde, gaty köp baralarda ata bilen enesine baglydyr, garaşlydyr.

Perzent dünýä ineni üçin ene-atasyna baglydyr, minnetdar bolmalydyr.

Perzent adam şekilli adam bolup ýetişeni üçin ata-enesine baglydyr, minnetdar bolmalydyr.

Perzent il hataryna goşulyp bileni üçin ata-enesine baglydyr, minnetdar bolmalydyr.

Allatagalanyň adamzady ýaradyşy şeýledir:

Ol adam balasyny adam bolup ýetişýänçä ene-atasyna doly bagly, garaşly edip ýaradypdyr. Adam dünýä ineni üçin Ýaradana alkyş okamalydyr, adam bolup ýetişeni üçin hem ene-atasyna minnetdar bolmalydyr.

(311-nji sah.) 

Perzendiň esasy borçlary
Türkmen terbiýesinde perzendiň esasy borçlary şu aşakdakylardan ybarat bolsun:

Ene-ataň buýrugyny berjaý et.

Oňlamadyk işiňden gaýt.

Onuň islemeýşi ýaly ömür sürme.

Mydama onuň öňünden çykyp, güler ýüz bilen garşy al.

Ömür saparynda oňa ýoldaş bol.

Mätäç bolsa, üstüne bar.

Diýenini wagtynda et.

Aýdanyny kyn görmän et, ýogsa köňli ynjar.

Ýanyňdaka gaty gepleme.

Agyrsa, ynjasa, gatyrganma.

Köňlüne gussa salma.

«Eje, kaka, siz» diýip ýüzlen, sensireme.

Gyňyr söz aýtma.

Gözüniň içine bakyp gepleme.

Hoşamaý bol.

Ýanynda pyňkyrma, ýakymsyz, jynssyz sesleri çykarma.

Iň ýagşy dostuň — eneň bilen ataňdygyny hergiz unutma.

Şatlansa — şatlan, gaýgylansa — agla.

Öwünse, gürlese — ýüzüňi çytma.

Garrylyk, tapsyzlyk zerarly jepa berse, giň bol.

Derdini paýlaş.

Ynjytmazlyga çalyş.

Şübhe etme.

Ýaşadykça uzak ýaş dile.

Egin-eşigi özüňkiden gowy bolsun.

Iýýäni özüňkiden gowy bolsun.

Salyhatly hyzmat et.

Arzuwyna ýetir.

Geregini bitir.

Zadyňy gysganma.

Dostlaryny dost tut.

Ýogalandan soň, adyna aýat-töwir et, sadaka ber. Çünki türkmen düşünjesine görä, merhumyň alnyna barýan aýat-doga diňe onuň öz perzentleriniň edýän dogalarydyr. Olara o dünýäde başga kişiden haraý ýokdur.

(334-nji sah.)