Beýik Alla öz keramatly emri bilen Nuh pygambere birnäçe mukaddes sahypalary inderdi. Nuh pygamber olary öz neberelerine ýaýratdy. Mukaddes sahypalaryň mazmuny şulardan ybarat: «AHLAK ARASSALYGY». Onda şeýle sözler bardy:

«Ýigitlere — namys, gyzlara — uýat, garry enelere, gojalara —akyl, paýhas, agraslyk, gelinlere — asyllylyk».

Nuh pygamber neberelerine — ýigitlere gaýratlylyk, ruhubelentlik, mertebelilik, birsözlülik, işewürlik öwretdi. Şolara çirk ýetirilmegini namys hasaplatdy. Türk iman — Türkmen ýigitleri öz dogduk ýerine, dogan-tirelerine, ata-enelerine şek ýetirilmegini namys saýyp, göreşe giripdirler.

Nuh pygamber gyzlarynyň, gelinleriniň, garry eneleriniň tenini uzyn, giň köýnek bilen örtmegi buýurdy. Saçlaryny ýaglyk bilen daňmagy buýurdy. Ýöne ýüzüni açyp goýdy. «Türk imanlaryň (türkmenleriň) ýüzi Beýik Taňrynyň nurundan dörän. Şonuň üçin Beýik Taňrynyň nur çyrasy — Kunuň (Günüň) şöhlesi düşüp durmalydyr. Çagaňyzyň we aýalyňyzyň ýüzüne urmaň» diýip, Nuh pygamberimiz wesýet edýärdi. Agzyny welin ýapmagy buýurdy. Bu ýapgy soňra ýaşmaga öwrülip gitdi. Gyzlara erkek adamyň ýüzi düşende ýeňi bilen gözüni ýapmagy, pesah (nälaýyk) sözleri eşideninde, ýeňini dişlemegi buýurdy.

Nuh pygamber garry gojalara we enelere ogul-gyz terbiýesinde akylly, agras, paýhasly, seresaply çemeleşmegi, olaryň hakyky ynsan häsiýetliligi üçin uly jogapkärçilik goýdy. Sebäbi Nuh pygamber ýaşlaryň ýalňyşmazlygyny isleýärdi. Ol: «Ulular bir gezek ýalňyşsa, ýaşkiçiler müň gezek ýalňyşar. Öýde ata ýalňyşsa, ogul ýalňyşar, ene ýalňyşsa gyz ýalňyşar, atalyk hem enelik (gaýyn ata hem gaýyn ene) ýalňyşsa, gelin ýalňyşar» diýip wagyz edýärdi. Şonuň üçin türk iman öý edebiniň düzgünini girizdi.

Ol edep-kadalar şulardan ybarat:

1. Ulyny sylamak.

2. Kiçini söýmek.

«Ulyny sylamasaň, kiçini söýmeseň adamçylyk ýiter. Birehimlik başlanar» diýip, Nuh pygamber sargaýardy.

3. Ata-enäni arzylamak.

Ol şunda çagalara: «Ata-eneňiziň ýüzüne garap sözlemäň, gyňralmaň. Buýran işini hökman ýerine ýetiriň!» diýip, hoşamaýlyk etdi. Çaga bolsa, bu zatlara derrew werdiş bolup gidýär.

4. Arassa hem ykjam geýinmek (daşky biçim).

«Geýim adamy bezeýär, göze mährem görkezýär. Özüňize gelişýän eşikleri geýniň» diýip, Nuh pygamber tabşyrýardy.

5. Öýde öz gazanan, der saçan zadyňy saklamak.

«Kişi zadyny göterme hem öýüňe getirme, öz hasabyňa geçirme!» diýip, Nuh pygamber sargaýardy. «Öý, ojak — zyýarathana» diýýärdi.

6. Öýüň bezegi, ýerli-ýerindeligi, göze gelimliligi, arassalygy.

«Öýüň her bir zady göwnüňi götermelidir, keýpiňi çag etmelidir, ýaşaýşa söýgi döretmelidir» diýip, Nuh pygamber tekrarlaýardy. «Öýüň hapa bolsa, özüň üflis, hapa-hasy bolarsyň» diýýärdi.

7. Öýüňi, öýüň içindäkileri, öýüň daşyny — goňşularyňy, golaýlaryňy, syrgynyňy goramak.

«Goňşy — syrgynlaryňyzy, ilki bilen, jan-dilden goraň. Sebäbi ýagy goňşyňy çapsa, seniň öýüňi-de çapar» diýip, Nuh pygamber sargaýardy.

8. Ruhubelentlik.

«Ruhuňyz belent bolsun. Şadyýan boluň. Ruhubelentlik ömrüňize nur-many çaýar, kyn işiňizi aňsat eder» diýip, Nuh alaýhyssalam öwredýärdi.

9. Gyz-gelin bezegi.

«Gyz-gelinleriňize zümerret daşlaryny gysganmaň. Nirede bar bolsa, tapyp getirip beriň. Gyz-gelniň göwnüni ýykan türk iman (türkmen) däldir. Ejiz, naçar göwni näzikdir. Olary näzik saklajak bolsaňyz, göwnüne ýetiň. Bezeg daşyny boýnuna, arkasyna, döşüne dakyň, ýöne ýüzüne degmäň, ýüzüň özi müň zümerretden zyýatdyr. Beýik Taňrynyň ýürekdäki mähir-nury ýüzde jemlenendir, dünýäni çyraglandyrýandyr. Şonda olar has owadan görner, näzik bolar, göwnüňizi açar, ruh berer» diýip, Nuh pygamber wesýet edýärdi. «Öýüň bezegi, ýakym-ýaraşygy gyz-gelindir. Bägül bagda gowy, gelin-gyz — öýde» diýip, pygamber gaýtalaýardy.

Mundan hem gaýry Nuh pygamber: «Ojaklaryňyzyň alawuny öçürmäň. Ojak öçse, ömür öçer. Ot — ýaşaýyşdyr. Ot bilen dertler dep edilýär, elhençlikler gorkuzylýar» diýýärdi.

(10-njy sah.)