«Taňry tarapyndan tagta çykarylan Beýik Hun Çyn-Maçyn hökümdaryna dogaýy salam diýýär, oňa saglyk arzuw edýär. Hökümdar aly jenaplaryndan geçen günlerde aramyzda parahatlyk hem ýakynlyk gatnaşyklarynyň esasyna degişli nama alnypdy. Bu ahwal her iki tarapyň arzuwyna laýykdy hem namalar manysyna görä ýerine ýetirilipdi.

Soňky döwürlerde siziň serhetdäki gullukçylaryňyzyň günbatar Toki şazadamyzy äsgermezligi netijesinde, Toki şazada meniň rugsadymy alman, Hu-Heu Nançžu hem beýlekileriň täsirine düşüp, Çyn-Maçyn gullukçylary bilen çaknyşmaga başlapdyr, şeýlelikde iki hökümdaryň arasynda gol çekilen ylalaşyklaryň garşysyna hereket edipdir, aramyzdaky doganlyk gatnaşyklaryna zyýan ýetiripdir, Han neberesini goňşy döwlete garşy duşman ýagdaýyna düşüripdir. Çyn-Maçyn hökümdarynyň gaharynyň gelendigini görkezýän iki namasy alyndy. Jogap namasyny getiren ilçimiz heniz yzyna dönen däldir. Barybir Çyn-Maçyn ilçisi-de yzyna dolanan däldir. Bu ýagdaý, iki goňşy döwletiň arasyndaky arzuw edilmedik ahwallara sebäp boldy.

Ylalaşyga garşy hereket birnäçe kiçi gullukçylar sebäpli boldy, olary jezalandyrmak üçin Toki şazadany ýüýeçileriň üstüne ýöriş etmegi emir etdim.

Taňrynyň ýardamy bilen nökerlerimiziň sagdyn hem güýçli, atlarymyzyň kuwwatly bolanlygy üçin ýygynymyz duşmanlar bilen söweşde uly ýeňiş gazandy, gylyçlarymyzyň kesgirliginiň saýasynda olary boýun egmäge mejbur etdiler. Soňky döwürde Orta Aziýada, Lölan, Usun, Hukut we şoňa meňzeş jemi 26 taýpany hem ülkäni hökmürowanlygymyza tabyn etdik. Bu ýurtlaryň ähli halky bizde nöker boldular, bütin bu iller biziň bilen bir öý (halk) boldular.

Demirgazyk ülkelerde howpsuzlygy hem abadanlygy gazananymyzdan soň söweşleri bes etmek, ýygyna dynç aldyrmak, atlary otlatmak niýetim bar. Aramyzda bolup geçenleri unudyp, köne ylalaşygy täzelemek isleýärin, edil öňki bolşy ýaly, serhetlerdäki halk parahatlyk içinde arkaýyn ýaşasyn, kiçijik çagalar ulalsyn, garrylar ömürleriniň soňuna çenli arkaýyn ýaşap bilsinler. Nesilden nesle parahatlyk hem buýsanç içinde ýaşasyn.

Şu mahala çenli Çyn-Maçyn hökümdarlygyndan jogap almadygymyz üçin köşk weziri He-u-Tsiýeniň üsti bilen gönderýärin. Onuň bilen bilelikde bir düýe, iki münülýän at, sekiz araba atyny gönderýärin. Eger hökümdar hunlaryň Çyn-Maçyn serhedine ýakynlaşmagyny islemeýän bolsa, serhet gullukçylaryna hem serhet halkyna serhetden uzaklaşmalaryny emir etmelidir». 

(214-216)