Diýdiler

Başy garly Köpetdagyň nagmasy bar diýdiler,
Mahal-mahal ýanan är deý nagrasy bar diýdiler,
Ýyldyrymlap, gök gürledýän çagbasy bar diýdiler,
Aýlanyp türkmen topragyn, ýagmasy bar diýdiler,
Daglarynda Gorkut ataň paýhasy bar diýdiler.

Tirsek urup ýatan daglaň behişt kybap jülgesi,
Derelerde seýil eder bulutlaryň kölgesi,
Köpetdagym ýöne dag däl, bu bir bagtyň çüwmesi,
Köýten, Hasar, Balkan dagy — külli türkmen dünýesi,
Daglarynda Oguz hanyň haýbaty bar diýdiler.

Deresinde gaplaň gürlän daglar başy dumandyr,
Depesinde bürgüt ýerlän daglar mydam juwandyr,
Eteginde iller örlän eziz diýar amandyr,
Çardagy bar Çandybilim — geljek ajap zamandyr,
Bu daglarda Göroglynyň namasy bar diýdiler.

Bir tarapym Garagumum — göçün uran kerwendir,
Duşman bolup gelene merk, türkmene erk bergendir.
Gahry gelse tüweleýläp, tupan bolup turgandyr,
Meger dünýäň ýaradylşyn gözi bilen görgendir,
Hydyrly çöl — Magtymgulyň halaty bar diýdiler.

(274-nji sah.)