Beýik Allanyň emri bilen, üçünji müňýyllygyň öňüsyrasynda — 1991-nji ýylda dörän garaşsyz Türkmenistan döwletimiz ilki-ilkiler kagyz ýüzündedi. Ösen jemgyýet, iş dolandyrýan edaralar, milli garaşsyzlyk barada aňyýet, özüni öz önümleri, harytlary bilen ekleýän ykdysadyýet, dünýä döwletleri bilen arkalaşykly gatnaşar ýaly milli syýasat ýaňy döräp başlady. Iň kyn ýeri, adamlaryň aňy, oý-pikiri garaşsyzlyga, onuň milli bähbitlerine düşünip ýetişmeýärdi, her kim öz ykbalyny garaşsyzlyk bilen baglanyşdyryp bilmeýärdi.

Garaşsyz milli döwlet gurluşyň, milli syýasatyň, halkyň göwnünden turýan milli aňyýetiň, milli ykdysadyýetiň, milli medeniýetiň, milli goşunyň bolmasa, doly garaşsyz döwlet bolup bolanok. Olary amala aşyrmak üçin wagt gerek, pesinden 10-20 ýyl. 

(14)

Beýik Taňry bize ümmülmez ýer-suw beripdir, ýerasty, ýerüsti baýlyk beripdir, akyl-paýhasly özüni ölçäp, özüne baha berip bilýän halkymyzy döredipdir, ynha indi hem Garaşsyz Türkmenistan döwletini berdi.

(14)

Garaşsyzlygyň, baky Bitaraplygyň on ýylynyň içinde biz türkmen topragynyň göwsüne häzirki zaman ösen kärhanalarymyz, beýik-beýik binalarymyz, durmuşymyzy, ýaşaýşymyzy özgerden tutumly işlerimiz bilen Ruhnamanyň ilkinji sahypalaryny ýazdyk!

Garaşsyzlygyň, baky Bitaraplygyň on ýylynyň içinde biz türkmen halkynyň aňyna, ruhuna, kalbyna ýagşy umytlar bilen, şuglaly harplar bilen Ruhnamamyzy ýazdyk!

(24)

XX asyryň başynda zorluk, zulum, uly gan dökülip gurlan kommunistik SSSR döwletinde 1987-nji ýyldan başlap jemgyýetiň dürli gatlaklarynyň, milletleriniň agzalalygy, haramçylygyň çenden çykanlygy sebäpli döwletde hökümet, häkimlik gowşady, tertip-düzgün ýitip başlady. Şol taryhy pursatda syýasy-ykdysady ýagdaýyň SSSR-de erbetleşýändigini duýup, özygtyýarlylygy isläp, 1990-njy ýylyň 22-nji awgustynda men Türkmenistanyň Ýokary Sowetiniň adyndan Jarnama bilen çykyş etdim. Şonda Türkmenistanyň bütin çäginde häkimiýetiň hökmürowanlygyny, özbaşdaklygyny, doly ygtyýarlylygyny, mizemezligini, daşary ýurtlar bilen gatnaşyklarda özüniň garaşsyzlygyny we deňhukuklylygyny, döwlet özygtyýarlylygyny kanuny taýdan durmuşa geçirjekdigimizi yglan etdim.

(46)

Mähriban türkmenler, ata-baba arzuw edilen taryhy pursat geldi. Şol döwürde men öz kärdeşlerim bilen garaşsyz döwlet döretmek üçin gijäni gündiz edip, ýadawsyz zähmet çekmeli boldum, kynçylykdan gaçmadym. 1991-nji ýylyň 26-njy oktýabrynda Türkmenistanyň Ýokary Sowetiniň geňeşini geçirdik, onda türkmeniň taryhy karary — Türkmenistan döwletiniň Garaşsyzlygyny ebedi ykrar etdik.

(46)

Bu wakanyň bolup geçen güni dünýäde ýene bir döwletiň —Garaşsyz Türkmenistanyň dörän senesi hökmünde taryha altyn harplar bilen ýazyldy.

Meniň ömrümde şol sene iň bir gymmatly, aýgytly we şatlykly pursat boldy.

Bu waka diňe meniň üçin däl, Garaşsyz Türkmenistanyň ykbaly oýanan tutuş halky üçin hem 

ömürlik ýatdan çykmajak dabaraly hem-de ýüreklere çuňdan ornaşan taryhy pursat bolar.

Ýoluň ak, tutumlaryň rowaç bolsun, Garaşsyz Watanym Türkmenistan!

(50-51)

SSSR ýykylandan soň onuň düzüminden çykan garaşsyz döwletler halkara maliýe guramalarynyň kömegi bilen özara hasaplaşygy doly geçirdiler. Netijede, Garaşsyz Döwletleriň Arkalaşygyna girýän döwletleriň arasynda emläk, serhet dawalary bolmaz ýaly wajyp ylalaşyga gelindi. Şol ylalaşykda, esasan, şu aşakdaky meseleler doly we gutarnykly çözüldi.

1. SSSR-iň düzüminden çykan garaşsyz döwletleriň serhetleriniň SSSR döwründäki çäklerinde mizemezdigi ykrar edildi;

2. SSSR döwründe her döwletiň çäginde döredilen emläkler garaşsyz döwletleriň öz döwlet emläkleri diýlip ykrar edildi;

3. SSSR-iň daşary ýurtlardan algysy we bergisi, SSSR-iň almaz, walýuta gaznasynda, altyn hazynasynda saklanylýan altynyň, baýlygyň möçberi we garaşsyz döwletleriň algydaky, bergidäki paýy kesgitlendi.

(51)

Garaşsyz Türkmenistan döwletiniň aýda ýyllyk ýoly alyp, baý, ösen döwlete öwrülip barýandygyny körler hem gördi, gözlüler hem, ýakynlar hem gördi, ýatlar hem. Hatda, başda biziň ýolumyza pitjiň atan maýda pikirli kişiler hem biziň ýolumyzyň hakdygyna göz ýetirdiler. Bu gün Türkmenistanyň ösüp barýan ýurtlaryň arasynda syýasy we ykdysady, medeni abraýy boýunça ýokary orna çykandygyna biz guwanýarys.

(71)

Biziň ýigriminji asyr diýilýän döwrümize Wagty hasratly duýmak mahsus boldy. Şeýle aýratynlyk ahyrsoňunda şol wagtyň özüni syndyryp Täze döwri — Garaşsyzlyk döwrüni amal etmegimiň içki ruhy esasy boldy.

(74)

Biziň Garaşsyzlygymyzy alalymyz bäri geçen döwrüň beýikligi — türkmeniň sarp ediji milletliginden dörediji millete öwrülip başlanlygydyr.

(75)

Biz ata-babalarymyzdan miras galan şanly türkmen ýolumyza guwanmaga, buýsanmaga doly haklydyrys. Bu ýol Garaşsyzlygymyzy we baky Bitaraplygymyzy almagymyz bilen bakyýete öwrülen altyn ýoldur.

(77)

Türkmen halkynyň taryhy ýoly şanly, göreşli ýoldur. Bu ýol bizi garaşsyzlyga getiren ýoldur.

(146)

Özbaşdak döwletli bolmagymyz türkmeniň asyrlarboýy eden arzuwyna ýetmäge mümkinçilik döretdi. Türkmen Garaşsyz, baky Bitarap döwlete eýe bolansoň, Nuh pygamberden gözbaş alan aslymyza nazar aýlamak, Altyn asyrda, altyn ruhda, altyn ýaşaýyşda ýaşamagymyza goltgy-tekge berjek kitaby döretmek zerurlygyny ýüze çykardy.

(147)

Türkmen bu gün öz berkarar, Garaşsyz döwletinde bir supra jem boldy. Türkmen ata-babalarynyň arzuwyna ýetdi.

(153)

Garaşsyzlyk türkmen milletiniň ykbalyny doly özgertdi, gutarnykly kemala getirdi.

(159)

Biz özümiziň milli döwletli bolandygymyza, täze türkmen milletidigimize çäksiz buýsanmaga haklydyrys.

Biz Garaşsyz ýurdumyzda gurulýan owadan-owadan binalara guwanýarys. Edil şonuň ýaly, biz halkymyzyň içki dünýäsinde, kalbynda gurlan we gurulýan «gözel binalary» görmegi-de başarmalydyrys.

(160)

Garaşsyz, baky Bitaraplyk ýolumyz türkmen milletimiziň mähir-muhabbetinden, arzuw-telwasyndan, asylly maksatlaryndan dörän, Altyn asyrda altyn ruhda, altyn ýaşaýyşda ýaşadýan ýoldur. Bu ýol türkmeniň bakylyk-dowamat ýoludyr.

(164-165)

Garaşsyzlygyň ilkinji aýlaryndan başlap, türkmen diliniň şireliliginiň, many goýazylygynyň, duýgy örüsiniň artyp ugrandygy tötänleýin zat däldir. Garaşsyzlyk türkmen dilini ýasamalykdan, dar galypdan halas etdi. Garaşsyzlyk diňe bir türkmen halkyna däl, eýsem türkmen diline-de azatlyk berdi.

(175)

Taryhymyzy çuň öwrenmäge biz Garaşsyzlyk ýyllary mümkinçilik tapdyk.

(178)

Türkmenler taryhda şunça döwletleri gurupdyr, bu gün bolsa, öz topragymyzda gaýtadan milli Garaşsyz döwletimizi gurýarys. Biziň binýat eden döwletimiziň güýji şondadyr, biz ahyrynda olaryň hemmesiniň üstünde başynyň täji, buýsanjynyň baýdagy bolup pasyrdaýan Garaşsyz hem baky Bitarap Türkmenistanymyza ýetdik. Biziň döwletimiz olaryň hemmesiniň taryhyna sarpa goýdy, barynyň adyny gaýtadan bir ýerde ýazyp, Oguz atamyzyň ruhuny direltdi. Bu biziň binýat eden döwletimize bularyň hemmesiniň taryhy dahyllylygyny görkezýär, şol bir wagtyň özünde bolsa, olaryň hemişe arzuw edip, hiç haçan ýetip bilmedik üç gudratyny özünde jemleýändir: olar milli Garaşsyzlyk, baky Bitaraplyk hem Türkmeniň Ruhnamasydyr.

(242-243)

Halkyna, Watanyna, Serdaryna ynanan türkmen 1991-nji ýylyň 27-nji oktýabrynda Garaşsyz Türkmenistan döwletini gurdy. Ol bize halkyna, Watanyna, adalatyna bolan berkligi, Oguz atamyzyň ýigrimi dört agtygynyň jebisligini getirdi. Erkinlik bilen millilik birleşip, azat Watanymyzda Garaşsyz döwletli bolduk. Baýdagymyzy, döwlet nyşanymyzy kökümiziň çuňlugyndaky dür manylardan aldyk.

(243)

Garaşsyzlygymyz, Bitaraplygymyz Altyn asyrymyza ýalkym saçar, şol belentliklerimizden nur alyp, Ruhnamamyzdan ruh alyp, nesip bolsa, geljegimizi tutuşlygyna altyna öwreris.

(245)

Keramatly Watan üstünde biz Garaşsyz, baky Bitarap Türkmenistan döwletimizi berkarar etdik.

Garaşsyz, baky Bitarap Türkmenistan, sen mukaddes döwletsiň, çünki biz seni keramatly ata Watanyň üstünde berkarar etdik.

Garaşsyz, baky Bitarap Türkmenistan, dünýe durar, sen durarsyň, çünki biz ömrümizi söýgä öwrüp, yhlasa öwrüp, mähre öwrüp saňa bagyş edýäris.

Garaşsyz, baky Bitarap Türkmenistan, sen ezizsiň, çünki sen ata-babalarymyzyň sekiz asyrlap arzuw edip, ýetip bilmedik döwletisiň, seni ata-babalarymyzyň arzuwyndan bina etdik.

Garaşsyz, baky Bitarap Türkmenistan, türkmen keramaty, türkmen mukaddesligi senden başlanýar. Senden ýokarda diňe Allatagala bardyr.

(247)

Paýhas ruhy Garaşsyzlygymyzy we Özbaşdaklygymyzy berkitmäge hyzmat etmelidir.

(248)

Garaşsyz, baky Bitarap Berkarar türkmen döwleti!

Men seniň keramatly türkmen döwleti bolmagyňy halys ýürekden isläp, bütin ömrümi saňa bagyş edýärin. Sen keramatly bolmalysyň, beýik türkmen döwleti!

Sebäbi seni türkmeniň keramatly topragynyň üstünde gurandyrys!

«Gurdugym aslynda bilgil bu zeminiň myhydyr,
Durar ol erkin mydam, budur türkmen binasy!»

— diýip, ýagşyzada atamyz Magtymguly seni hyýalynda berkarar kylypdyr, biz onuň hyýalyny durmuşa geçirdik.

Garaşsyz, baky Bitarap Türkmenistan döwleti, sen keramatly bolmalysyň, çünki biz keramata öwrülip giden ata-babalarymyzyň ýoluny tutup, seni bina etdik.

(252-253)

Buýsançly başyňy, ynançdan doly gursagyňy, nanly saçagyňy göreýin diýip, gijeler çirim etmedim, gündizler oturmadym, eziz halkym! Hudaýa şükür, Allanyň keremi bilen, ata-baba sahawatly ýurdumyzda, gör, näçe asyrdan soň, täze Garaşsyz döwleti gurduk. Seniň üçin — her bir raýatyň üçin bu döwletde ähli maddy şertleri döretdik, dünýäniň men diýen halklaryna hem döwletlerine özümizi ykrar etdirdik. Bu döwlet berkarar bolsun, ömürbaky synmasyn, onuň raýatlarynyň hiç haçan başy egilmesin diýip, oňa dünýäde iň ýokary ygtybarlylygy — Bitaraplyk hukugyny alyp bermek bagtyny meniň hem egindeşlerimiň ykbalyna ýazandygy üçin keremli Taňrydan müňde bir razydyryn.

(254-255)

Alty ýüz ýyldan soň Garaşsyz türkmen döwleti gaýtadan döredi.

(255)

Garaşsyz Türkmenistan döwletini yglan eden badymyza, tutuş halkymyz ony sekiz asyrlap arzuw edilen milli döwlet hökmünde kabul etdi.

(268)

Türkmenistan Garaşsyzlygyny alan dessine, döwletiň iň ýokary gymmatlygy adamdyr, onuň ömrüdir, saglygydyr, howpsuzlygydyr, onuň doly manydaky ahlak we beden ösüşidir diýip, jar etdi. Ýurtda ilaty durmuş taýdan goramak iň öňdäki hatara sürüldi we bu ugur durmuşa geçirilip başlandy. Bu bolsa jemgyýetçilik-syýasy durnuklylygy üpjün etdi, durmuşa geçirilýän özgertmelere ynam döretdi. Türkmenistanda geçirilen düýpli çäreleriň netijesinde, Garaşsyzlyk ýyllarynda çaga ölümi azaldy, ömrüň uzaklygy artdy, jenaýatçylyk kemeldi, ýurtda eneligi we çagalygy goramak, ýaşlaryň, aýallaryň, garrylaryň hukugyny berkitmek boýunça güýçli kepillikler döredildi.

(280)

Eziz türkmenim, ýalňyşmaň, öz öýkäň bilen Watanyň, Garaşsyzlygyň beýikligini ölçeme! Ol gymmatlyklaryň bahasyna ýetme ýokdur.

(296)

Ata Watany, ene topragy jandan söýmek we onuň Garaşsyzlygyny gözüň göreji deýin goramak seniň mukaddes borjuňdyr.

Garaşsyzlygyň hatyrasyna seniň ata-babalaryň katra-katra ganyny dökdi.

(336)

Türkmen arzuw eden garaşsyzlygyna ýetdi. Bu Garaşsyz jemgyýetimizde dost-doganlyk baş ýörelgämiz bolsun! Türkmen Garaşsyz jemgyýetde bir jan-bir ten bolup, dost bolup, dogan bolup agzybirlikde ýaşamalydyr.

(354)

Eziz ilim, şu Ruhnamadan ugur alynsa, Türkmenistanyň öz Garaşsyzlygyny, öz ilatynyň asuda, parahat durmuşyny ösdürmäge, goramaga güýjüniň ýetjekdiginden gaty arkaýyn bolup bilersiňiz.

(376)

Milletiň taryhynda ilkinji gezek öz ruhy döwlet ýörelgelerinde milli gymmatlyklary esas edip alýan türkmen döwleti döredi, olary sypatlandyrýan milli Baýdak döredildi — munuň özi özbaşdak döwletiň Garaşsyzlygynyň nyşanydyr.

(400)

Dünýä dursun, Türkmenistan dursun, dünýä dursun, türkmen dursun, Garaşsyz, baky Bitarap Türkmenistanyň ömri dowamat dowam bolsun!

(406)