Seljuk soltanlary zamanasynda türkmenleriň aga-ýana döwran sürüp ýaşan döwründe soltan Sanjar Enweriniň bir rubagysyny okap görüpdir-de, ony köşge çagyrypdyr.

Pelegiň gerdişi, melgun dünýesi,
Azap berip köp çekdirdi külpeti.
Ýerden-gökden gelýän bela soraýar:
«Niredekä Enweriniň külbesi?!»

Soltan Enweriniň rubagysyny okap bolýar-da:

— Eý, şahyr, ähli bela-beterler diňe seniň öýüňi sorag-ideg edip, seniňkä gelýän bolsa, täleýiňden nalap oturman, oýlan. Meniň özümde bir günä bar bolaýmasyn diý. Sebäpsiz çöp başy gymyldaýan däldir. Şol gymyldaýan çöp seniň bolşuňdan habarlydyr — diýipdir.

Enweri soltanyň näme diýmek isländigine — kül üstünde otursa-da, göwnüniň Kap dagyndadygyny, islegi bilen ýaşaýşynyň deň gelmeýändigini, oňşuksyzlygyny, bir ýerde uzak durmaýandygyny göz öňünde tutýandygyna düşünipdir.

(307-308)

Seljuk türkmenleri zamanasynyň beýik türkmen şahyry Enweri kalby duýgudan lummurdap duran çaglary ýagşyzada duşýar. Ýagşyzada:

— Allanyň eradasy bar, sora, göwün islegiň şu demde wysal bolar — diýipdir.

— Meniň islegim wysal boljak bolsa, käbäm enem bilen, mähriban atamyň didaryny bir pursat görkeziň, goý, olar öz balasynyň ölmän, har-hor bolman adam bolandygyny görsünler, baky dünýäde ynjalyk tapsynlar — diýip, Enweri haýyş edipdir.

Ýagşyzada Hakyň buýrugy bilen Enwerä enesiniň hem atasynyň didaryny görkezipdir. Olar didarlaşyp, bagtyýar bolupdyrlar.

Ýagşyzada:

— Sen baýlyk, soltanlyk soran bolsaň-da berilýärdi, emma has mukaddes zady soradyň. Bar, saňa ynsan göwünleriniň şalygyny berdik — diýipdir.

Şahyr Enweri soltan Sanjaryň penasynda külli seljuk türkmenleriniň, arap-ajamyň ajaýyp şahyry bolýar. Ol pygamber hasaplanýan üç şahyryň biridir.

(322)

Türkmen entek beýik şahyr Enwerini az bilýär. Men mahal-mahal oturyp: «Enweri ata-ene didary babatda müň kerem mamla, şu mahal maňa atam-enem didaryny görkezseler, barymy bererdim» diýip oýlanýaryn...

(324)