Döwlet milleti bitewileşdirmegiň serişdesidir hem guralydyr

Alty ýüz ýyldan soň Garaşsyz türkmen döwleti gaýtadan döredi. Bu günki Garaşsyz türkmen döwletiniň taryhy ähmiýetine iki nukdaýnazardan seredeniňde hasam oňat akyl ýetirýärsiň. Birinjiden, türkmeniň döwletsiz ýaşan döwri bilen deňeşdireniňde. Döwlet milleti bitewileşdirmegiň serişdesidir hem guralydyr.

Döwlet — halk möçberindäki uly öýdür

Döwlet — halk möçberindäki uly öýdür. Ol öýde durmuşyň kadaly ýöremegi üçin her kimiň öz orny hem öz ýerine ýetirmeli wezipeleri bolýar. Şol wezipeleriň oňat ýerine ýetirilmeginden döwletiň ýaşaýşy kemala gelýär.

Garaşsyz döwletimiz milli döwletdir

Biziň Garaşsyz döwletimiziň esasy aýratynlygy — onuň milli döwletligindedir. Şu aýratynlyga ýetmiş ýyllap biziň üstümizden agalyk eden sowet döwleti bilen deňeşdireniňde oňat göz ýetirýärsiň. Sowet döwleti hökmürowan döwletdi, ol şu topragyň eýesi bolan türkmen halkynyň taryhy taýdan ýokary galmagyna däl-de, onuň egninden basylmagyna hemaýat edýärdi. Ol döwlet türkmeniň maddy baýlyklaryny özgäniň adyna hem haýryna geçirmegiň, onuň gazanan ruhy baýlyklaryny ýok etmegiň guralydy.

Türkmen milli döwleti

Türkmen milli döwleti diýmek — şu ýurduň erk-ygtyýarly eýesi diýmekdir. Milli döwlet ýurduň maddy baýlyklaryny şu millete siňdirýär we onuň ruhy gazananlaryny rejeleýär. Diýmek, döwlet milletiň taryhy ýaşaýşyny gurnamagyň usuly bolup döreýär hem-de ýaşaýar.

Döwlet — milli ruhuň gaýmagydyr

Döwlet — milli ruhuň gaýmagydyr. Hut şol sebäpden milli döwlet millete mahsus ähli ruhy-ahlaky sypatlarynyň amal bolmagyny, syýasy erk arkaly bir ýere jem bolmagyny alamatlandyrýar. Hiç mahal döwlet boş ýerden döremeýär.

Milletiň iň beýik ruhy güýçleri döwletde jemlenýär

Milletiň iň oňat, iň beýik ruhy güýçleri we mümkin­çilikleri döwletde jemlenýär. Türkmeniň birnäçe asyrlap dowam eden taryhy pajygasy onuň iň oňat güýçleriniň bir ýere jem bolmanlygyndan ybaratdyr. Döwlete gulluk etmek — milletiň özüniň içki kuwwatlyklaryna gulluk etmekdir. Döwlete gulluk etmek bilen bütin millet öz şu gününi we geljegini üpjün edýär.

Milli döwlet — milletiň öz durmuşyny içki taýdan gurnamagynyň taryhy usulydyr. Hut milli döwletde milletiň ýaşaýyş ukyplary bir ýere jemlenýär. Ol bir ýere jem bolubam, milli durmuşy taryhy taýdan rejeleşdirmek, sazlaş­dyrmak işine girişýär. Milli döwleti gurnamak ukyplylygy — halkyň taryhy ýaşaýşa ukyplylygydyr, geljegini amal etmäge ukyplylygydyr.

Milli döwlet köki çuňluklardan gaýdýan, örän berdaşly daragtdyr

Milli döwlet keseki ýurtdan, özge ýerlerden getirilip oturdylan, şu ýurduň suwuna, topragyna laýyk gelmeýänligi üçin gurap galýan daragt däldir. Tersine, ol hut şu topragyň aýratynlyklaryndan ösüp çykan, şonuň üçinem köki çuňluklardan gaýdýan, örän berdaşly daragtdyr. Öýkünjeňlik hiç bir işde-de gowy däl, döwlet gurluşygy babatda öýkünjeňligiň howpy has uly. Çünki munda milletiň bähbitleri we geljegi ara düşýär.

Döwlet gurmak — milletiň öz-özüni döretmegidir

Döwlet gurmak — milletiň öz-özüni döretmegidir. Syýasy, ykdysady, jemgyýetçilik we ruhy babatlarda öň bolmadyk gymmatlyklar döredilýär.