Bu topraga, bu diýara beýik Allatagalanyň nazar salan diýary Türkmenistan — Garaşsyz, baky Bitarap Türkmenistan diýerler!

(79)

Men ertirki bagtyýar günümizi görýärin. Şu günki, ertirki bagtyýar ýaşaýşymyza hiç bir zadyň zeper ýetirip bilmejekdigine, baky Bitaraplygymyza çäksiz buýsanýaryn.

(158)

Garaşsyz,baky Bitaraplyk ýolumyz türkmen milletimiziň mähir-muhabbetinden, arzuw-telwasyndan, asylly maksatlaryndan dörän, Altyn asyrda altyn ruhda, altyn ýaşaýyşda ýaşadýan ýoldur. Bu ýol türkmeniň bakylyk-dowamat ýoludyr.

(164-165)

Türkmenler parahatçylyk söýüji, ylalaşdyryjy millet

Men Birleşen Milletler Guramasynyň döredileniniň 50 ýyllyk dabarasynda hemişelik Bitaraplyk şygarymyzy dünýä yglan edenimde, oguzlaryň-türkmenleriň, seljuklaryň ýaýran sebitindäki medeniýetlerde miras paýymyzyň bardygyny ýöne ýere aýtmadym. Häzirki zamanda bu biziň biri-birimize taryhdan gelýän düşünişmek ýolumyzyň gowy nusgasy bolup hyzmat edýär. Bularyň barysy türkmenleriň parahatçylyk söýüji, ylalaşdyryjy häsiýetini diňe bu gün bilmeli däl, hatda olar taryhy barlygy bilen bizi gowy tanan, gatnaşygy bolan ýurtlardyr, şonuň üçin ilki bilen biziň goňşularymyz, sebitdäki döwletler Bitaraplyk derejämiz alnanda bizi goldadylar. Bütin dünýä goldady.

(244)

Garaşsyzlygymyzdan soň, biziň gazanan ýene bir uly binýadymyz bar, ol hemişelik Bitaraplygymyzdyr.

(244)

Oguz atamyzyň ynanjy – Garaşsyz döwletimiziň binýady

Gögüň hemişe asuda bolmagyny Oguz hanyň bäş müň ýyl ozal diliniň dogasyna öwrüp sena edendigi hakykatdyr, açyk asmanyň asuda bolmagy atalarymyzyň ynanjy bolupdyr. Biz halkymyzyň gadymdan gelýän bu ynanjyny Garaşsyz döwletimiziň esasy binýadynyň birine öwrüp, ony kanun­laşdyryp dünýä doldurjagymyza ynandyk.

(243)

Dünýä dolmagyň açary asudalykdan başlanýar

Dünýä dolmagyň açarynyň asudalykdan başlanýandygyny ilkinji günlerden bäri bilýärdik, hatda il-günümiz onuň goňşokara tabagyndan başlanýandygyna ynanyp gelipdir. Biz bu hoşniýetli häsiýet­lerimizi has ösdürdik, ony ykdysadyýetimizde Açyk gapylar syýasatyna, daşary syýasatymyzda bolsa, hoşniýetli Bitaraplyk syýasatyna öwürdik. 

(243)

Açyk gapyly Türkmenistan

Jahana dolmagyň, oňa göwnüňi berip, dünýäni göwnüňe doldurmagyň ýolunyň ilki bilen öz öýüň hözirini görüp bilmekdigine düşündik. Şeýdip, başdan açyk gapyly Türkmenistany döredip, ähli göwünlerde tagt gurmagy baş wezipelerimiziň biri saýdyk. Ilki bilen sebitdäki goňşy döwletlerimizden başlap, dünýädäki ähli döwletler biziň ýolumyzyň dogrudygyny aýdyp, bizi goldap başladylar. 

(243)

Türkmenistan – dünýäniň ýeke-täk resmi Bitarap döwleti

Döwletimize 1995-nji ýylyň 12-nji dekabrynda 185 döwletiň ses bermegi bilen Birleşen Milletler Guramasynyň Baş Assambleýasy tarapyndan hemişelik Bitaraplyk derejesi berildi. Şeýdip, dünýäde ilkinji gezek bitarap döwlet kanunlaşdyrylyp, dünýäniň ýeke-täk resmi Bitarap döwleti bolduk. Birleşen Milletler Guramasynyň baýdagyndan parahatlyk nyşany hökmünde zeýtun baldajygyny alyp, ýaşyl baýdagymyza ýerleşdirdik. 

(243)

Garaşsyzlygymyz, Bitaraplygymyz Altyn asyrymyza ýalkym saçar, şol belentliklerimizden nur alyp, Ruhnamamyzdan ruh alyp, nesip bolsa, geljegimizi tutuşlygyna altyna öwreris.

(245)

Syýasy jähtden, öz donumyzy özümiziň biçmegimize ygtyýar beren Garaşsyzlygymyz, jümle-jahana parahatlygyň gül ysyny ýaýradýan Bitaraplygymyz barka, halkymyzyň baý ruhuny öňe çykaryp, adam gatnaşyklarynda, döwrebaplykda nusga alarlyk derejä ýetjegimiz görnüp dur.

(245-246)

Bu döwlet berkarar bolsun, ömürbaky synmasyn, onuň raýatlarynyň hiç haçan başy egilmesin diýip, oňa dünýäde iň ýokary ygtybarlylygy — Bitaraplyk hukugyny alyp bermek bagtyny meniň hem egindeşlerimiň ykbalyna ýazandygy üçin keremli Taňrydan müňde bir razydyryn.

(255)

Şu günki üstünlikleriň başlangyjy Garaşsyzlygyň we baky Bitaraplygyň ýetişdiren miwesidir. 

(287)

Garaşsyz we baky Bitarap türkmen ilimiz dostlugyň we doganlygyň ili bolmalydyr.

(359)

Uly-uly döwletler gurup, aga-ýana döwran süren ata-babalarymyzyň haky üçin, Watan ugrunda başyny goýan ärleriň, şirleriň, gerçekleriň haky üçin döwletimizi — Garaşsyz, baky Bitarap Türkmenistany kuwwatly, beýik döwlete öwreliň!

(404)

Türkmen halkym hiç mahal uly halkyň öňünde kiçel­mesin, kiçi halkyň öňünde ulalmasyn. Dünýäde döwletara, milletara gatnaşyklarynda, türkmenler, deňag­ramlylygy saklaň, ol hemişelik Bitarap  Türkmenistanyň syýasatynyň sarsmaz bir sütüni bolsun!

(406)