Oguz han türkmen topragynyň bagy-bossanlyk bolmagyny isläpdir. Ol her esgere söweşden öň nahal ekdiripdir. Nahal ekmedik esger ýörişe äkidilmändir. Oguz han döwründe biziň ata-babalarymyz dag eteklerine, Bäherden taraplaryna, Durun taraplaryna ýazlamaga geler ekenler, ol ýerler biziň halkymyzyň oturymly ýerleridir. Dagdaky arçalary çapmak günä hasaplanypdyr. Ýöne geçen asyrda bu ýere demir ýoluny çekjek bolanlarynda sypaly uzak ýerden getirjek bolup durmandyrlar. Käbir ýerli hannaslaryň pul bilen gözlerini güýdüşdirip, dagdan sypallyk agaç getirdipdirler. Şondan soňam Köpetdagyň äpet-äpet arçalary satuwa düşüp, towsa göterilipdir.

(178-nji sah.) 

Biziň ilata tebigy gazy mugt berýändigimiziň, «Gök guşak»  syýasatymyzyň durmuşa geçirilmegi netijesinde, türkmen topragynyň ata-babalarymyzyň döwründäki gözelligine, bereketine eýe boljakdygyna berk ynanýaryn, guwanýaryn. (179-njy sah.)

Ýunan alymlary Diodor we Strabon Girkaniýanyň we Margiananyň gözel tebigaty barada

Türkmen topragynyň ata-babalarymyzyň döwründäki gözelligine, bereketine diýenimde men nämeleri göz öňünde tutýaryn. Gysgaça aýdanymda, men biziň eýýamymyzdan öňki I asyrda ýaşap geçen ýunan alymy Diodaryň, biziň eýýamymyzyň I asyrynda ýaşan Strabonyň ýazgylaryndaky tebigat gözelliklerini we bereketini göz öňünde tutýaryn. Ine, olaryň galdyran ýazgylaryndan iki bölek mysal: «Aleksandr (Makedonskiý) Girkaniýanyň ähli şäherlerini basyp almak bilen, «Bagtly ilat»  diýilýän ýere ýetdi. Dünýäniň hiç bir ýurdy özüniň baýlygy hem-de täsin miweleri bilen oňa taý gelip bilmez. Girkaniýa köp şäherli, gaty uly, mes toprakly düzlük ýurt. Bir düýp üzümiň hasyllylygy 450 kilograma, injiriňki 3 tonna barabar bolýar. Orak wagty ýere dökülýän däneler bolsa geljek ýylyň bol hasylynyň düýbüni tutmaga bolelin ýetýär. Ol ýerde dub agajyna meňzeş daragt bar. Onuň ýapraklaryndan bala meňzeş suwuklyk akýar. Ýerli ilat ony iýmit üçin peýdalanýar. Tokaýlarda balçylyk bilen meşgullanýarlar» .

«Çöller bilen gurşalan oazis Marg derýasy bilen suwarylýar. Margiananyň ýerleri örän täsin. Ol ýerde bitýän üzümler örän ajaýyp, olaryň her hoşasy iki tirsek boýuna çenli ýetýär. Bu üýtgeşik mes toprakly oazisi goramak üçin Antioha, Söter onuň daşyna ini 5,2 metr bolan, uzynlygy 250 kilometre ýetýän beýik haýat aýlady» .

Ol haýat ýene bolar, ýöne ol indi palçykdan däl-de, göm-gök öwüsýän daragtlardan bolar.

(179-njy sah.)

Nesip etse, türkmeniň bagy-bossanam türkmeniň topragynda ýaňadan öwüşgin atar.

Türkmenistan bagy-bossan bolar.

Bu mesele döwletiň syýasaty bolmalydyr, senem, mähriban ildeşim, Türkmenistanyň jennete öwrülmegi üçin çalyş. Men her bir döwletli türkmen maşgalasyna ýüzlenýän: Taňrynyň öňündäki, iliň öňündäki bergisini berjek bolsa, her maşgalanyň agzasy ýylda bir nahal agajyny ýaşaýan köçesinde, howlusynda, töwereginde, öwlüýäde eksin!

(381-nji sah.)