Bir üýşmeleňde oba ogrusy hakda gürrüň bolýar. Şonda Azady şol ogrynyň gowy sypatyny açyp görkezýän bir wakany oturanlara gürrüň beripdir. Halypasyna belet sopular dil düwşen ýaly, ýeke-ýekeden şol ogry diýilýän adamyň gowy tarapy hakda söhbet edipdirler. Bu gürrüňe beýleki adamlar hem goşulypdyr, garasaý, şol ogryny perişdäniň bäri ýanyndaky adam edip goýaýypdyrlar...

Aý geçýär, gün geçýär, günleriň bir güni şol ogry Azadynyň öýüne baryp:

— Gudratyňyzdan aýlanaýyn, Azady ahun, meni nä günlere saldyňyz? — diýip, galkyjaklapdyr. — Siziň pylan üýşmeleňde eden gürrüňiňiz maňa baryp ýetdi, eşidip depäm gök diredi. Ogurlygy şol gün kesdim. Ýöne sähel telek iş etsem «Azady ahun eşidäýse näme diýerkä?» diýip, gaty heläk bolýan. Siz böwrümiň bir ýerinde otyrsyňyz — diýipdir.

— Seniň böwrüňde imanyň otyr, inim, seniň ynsabyň oýanandyr...

Ýene bir üýşmeleňde Azadydan biri sorapdyr:

— Ahun aga, siz pylanynyň ogrudygyny bilýädiňizem weli, arada ony magtap, asyl adam edip goýaýdyňyz, munuň hikmeti nedir?

— Birew barada sen ýagşy gep aýtsaň, men ýagşy gep aýtsam, ol ýagşy gep aýtsa, onuň bir topar ýagşy taraplary görner. Eger tersine, birew barada sen bir ýaman zat diýseň, men bir ýaman zat diýsem, ol gazanyň garasy çalnan ýaly bor. Oňarsaň, birewiň ýamanyny ýapyp, ýagşysyny ýaýyň! Şeýtmek türkmen halkyna muwapyk sypatdyr.

(301-302)

Döwletmämmet Azady «Baýlyklaryň baýlygy — parasat, miraslaryň iň gymmatlysy — edep-terbiýe, gedaýlygyň gedaýlygy — nadanlyk» diýipdir.

(43)