Dünýäniň jahankeşdeleri, geliň, geçiň, gapymyz hem açyk, kalbymyz hem açyk, syýahat ediň! Oguz hanyň, Gorkut atanyň, Seljuk hanyň, alplar alpy Alp Arslanyň, Mälik şanyň, Soltan Sanjaryň, Göroglynyň, Magtymgulynyň topragyna syýahat ediň! 

(29-njy sah.)

Onlarça döwletden paç alyp, şalar şasy bolup ýaşan beýik türkmen soltany Alp Arslan goluna düşen ganym duşmany ölüm jezasyna höküm edýär.

— Her goluna, aýagyna at baglap dört para eýläň!

Duşman ýöne duşman däl, duşmanlaryň hany, ol:

— Sen namart, maňa mert ölümi hem rowa görmeýärsiň! — diýip gygyrýar.

Alp Arslan serkerdelerine ümläp, oňa ýarag berdirýär. Soltan gazaplanyp gylyjyny syryp, duşman bilen gylyçlaşmaga ylgaýar, ýöne gazap gany beýnisine uran soltan çadyryň ýüpüne büdüräp ýykylýar, şondan peýdalanyp, duşman oňa gylyç urup ýetişýär...

Hekimler ony bejerip başlaýarlar, her kim namart duşmana gargaýar, şonda Alp Arslan:

Bu emgegi duşmandan görüp oturmaň, bu emgek ýokardan geldi... Düýn hol depä çykanymda göwnüme men-menlik aralaşdy. Giň dünýä sygman ýaýrap ýatan ýygynymy, akly-gyzylly çadyrlarymy, ýigitlerimi synlap: «Heý, Alla, ýedi yklymda meniň alnymdan çykybiljek patyşa barmydyr?»  diýip, içimden öwündim. Bu bela şondan gelen bela!  — diýipdir.

(194-nji sah.)

Nyzamylmülk köşk hile-pirimini ulanyp, beýik wezirlik wezipesine geçdi diýip takyk aýdyp bolar. Ol garry wezir bilen soltan Alp Arslanyň arasyna duşmançylyk atmagy başarýar. Ýaş soltan garry weziri ölüme höküm edýär. Şonda garry wezir ölüminiň öň ýany Nyzamylmülke:

– Sen türkmen hökümdarlaryna gan dökmegi öwretdiň! — diýýär. 

(223-nji sah.)

1063-nji ýylda Çagry begiň ogly Alp Arslan tagta geçýär. Ol türkmenlere Rum iliniň derwezesini açan soltandyr. 

(227-nji sah.)

Mähriban watandaşym, beýik türkmen ogullarynyň — Muhammet Togrul begiň, Dawut Çagry batyryň, Alp Arslanyň, Mälik şanyň, Soltan Sanjaryň döreden döwletleri, gahrymanlyklary, mertlikleri, parasatlylygy, özlerini bütin yslam döwletleriniň soltany diýip yglan etdirişleri deňi-taýy bolmadyk wakadyr. Türkmen halkymyz üçin ol beýik şahslar barada aýratyn kitaplar, maglumatlar ýazylmalydyr. Guwan, türkmenim, aslyňa! 

(227-nji sah.)

Bu döwletiň binýat edilmeginiň esasy sebäpleriniň biri soltan Alp Arslanyň 1071-nji ýylda Malazgirt söweşinde ýeňiş gazanmagydyr.

(230-njy sah.)

Danalykda danyşment bol, Pyragydyr Gorkuda,
Batyrlykda — Alp Arslana, Çagry bege, Togrula.
Yzdan ýörmek gelişmez Oguz hanyň kowmuna
Türkmeni beýik türkmen edip biljek — türkmendir! 

(303-nji sah.)

Garaşsyzlygyň hatyrasyna seniň ata-babalaryň katra-katra ganyny dökdi. Oguz han, Gorkut ata, Alp Arslan..., Gökdepe galasynyň gahrymanlary ýaly ençeme men-men diýen ärler mertlikde türkmeni ýedi yklyma tanatdy. Sen olaryň neslisiň. Saňa diňe mertlik we watansöýüjilik ýaraşar. Watanyň duzuna, asly halal ene süýdüne wepaly bol! Çünki Watan duzy we ene süýdi — mukaddesdir, keramatdyr. 

(336-njy sah.)