BEÝIK ALLANYŇ ADY BILEN

Eziz halkym!

Mähriban milletim!

Gudraty güýçli, bu täsin dünýäni döreden eziz Taňrynyň ýüregime salan emri esasynda dörän kitap — türkmeniň Ruhnamasydyr.

Adamzat döräli bäri Beýik Alla türkmen milletini taryhyň dürli döwürlerinde uly-uly synaglardan geçirdi. Meniň halkym ol synaglaryň öňünde durup bildi.

(9-njy sah.) 

... Beýik Allatagala gözeldir we ol gözel zatlary söýýär, türkmen Beýik Allatagalanyň söýgüsine mynasyp adam bolmalydyr.

(16-njy sah.) 

Okamak, öwrenmek — Beýik Allatagalanyň alkyşydyr.

(17-nji sah.) 

Söz — beýik Allatagalanyň ynsana eçilen iň keramatly peşgeşidir.

Söz — ynsanyň miwesi. Ýöne ol miwe adama Alla tarapyn berilýändir.

(20-nji sah.) 

Allanyň kitaby — Gurhany kerim mukaddesdir, ony hiç bir kitap bilen çalşyp bolmaz.

(21-nji sah.) 

Beýik Allatagala bizi Adam edip ýaratdy, biz adam bolup dünýä indik, indi ajaýyp bir jemgyýet gurup, eşretli döwran sürüp, her bir ildeşimiziň ýagşyzadalaşmagyna ýol açmak biziň mukaddes borjumyz!

(28-nji sah.) 

Beýik Allatagaladan dilegim, türkmeni aslyna gaýdyp getir! Oguz handan başlap orta asyrlaryň ahyryna çenli agzybirligi, batyrlygy, watansöýüjiligi, halallygy, geçirimliligi, dini, dili, medeniýeti — Beýik Ruhy bilen tanalan halk hökmünde ýaňadan XXI asyrda milletimiziň dowamatyny ber, ýeke-täk Beýik Taňrym! Beýik Taňrymyza sygynyp, her bir türkmen asly halal ata-babalarymyzyň gylyk-häsiýetlerine eýe bolsun!

(45-nji sah.) 

Türkmen beýik Allatagalanyň ýeke-täkligine uýdy, Allanyň ýedi yklymda wakalaryň barşyny ugrukdyrýandygyna ynamyny hemişe saklaýar, durmuşdaky her bir wakada tutuş heňňamdaky her bir hadysada onuň gudratynyň alamatlaryny görýär, ony senalarynda ýatlaýar, oňa sygynýar.

(58-nji sah.) 

Adam — Allatagalanyň Wagty syzmak üçin ýasan guralydyr. Beýnisinde akyl bolany üçin, adamyň süňňi-de özge janly-jandarlaryňkydan tapawutlydyr, ýagny Wagty syzmaga ukyplydyr.

(73-nji sah.) 

Türkmen bir işe başlamazdan ozal, böwrüne diň salýar, böwrüne geňeşýär, ynsanyň böwründe bolsa Allatagala otyr. Böwrüňize diň salyň!

(95-nji sah.) 

Bir zat aýan: dünýä, adamzada, ýaşaýşa diňe Allatagalanyň nazary bilen seretmeli! Emma Allatagalany gören-bilen, oňa akyl ýetiren ýok, şonuň üçinem Allatagalanyň kalbyňa salan ynsaby-imany bilen seretmeli!

(185-nji sah.) 

Dünýäde Adamdan beýik keramat ýokdur, Adamyň mertebesi Allatagalanyň münberidir.

(190-njy sah.) 

Allatagala sizi men-menlikden daş etsin, Allaňyzdan aýra düşmäweriň!

(197-nji sah.) 

Allatagala mawy boşluk içre aýlanyp duran Zeminine hak aşyk bolup Adam ogluny ýaradypdyr. Adam ogly ýaradylmyş topragyna-da, dünýäsine-de, Allasyna-da hak aşykdyr.

(200-nji sah.) 

Allatagala adamy şeýle ýaradypdyr: hakyky azatlyk hem, hakyky gulçulyk hem adamyň içindedir.

(202-nji sah.) 

Türkmen milleti Allanyň nazar salan, Allanyň söýen milletidir. Men muny göze dürtülip duran bir hakykatda görýärin: Allatagala türkmeni söýeni üçin hem ony bäş müň ýyl bäri ýaşadyp gelýär. Eger söýmedik bolsady, onda birmahal ony Wagt aždarhasynyň agzyna bererdi.

(206-njy sah.) 

Garaşsyz, baky Bitarap Türkmenistan, türkmen keramaty, türkmen mukaddesligi senden başlanýar. Senden ýokarda diňe Allatagala bardyr.

(247-nji sah.) 

Allatagalanyň öz döreden bendesine — Adama bolan beýik söýgüsini her bir ädimde görýärin. Üç ýüz segsen müň görnüşli ot-çöp bar, olaryň hemmesi hem gülleýär, hemmesi hem özüni Adama görkezmek üçin gülleýär! Ol güller biri-birinden owadan, biri-birinden ysly, biri-birinden täsin. Olaryň hemmesi Allatagalanyň adama goýan sarpasy ahyry! Allatagala bu dünýäni adamzat üçin ýaradypdyr. Allatagala tebigaty, ähli oty-çöpi, guş-gumursylary, ähli zatlary adamzat üçin ýaradypdyr. Ähli zat Allatagalanyň beýik söýgüsinden döräpdir.

(251-nji sah.) 

Allatagala adamy döredende oňa ten beripdir, ruh beripdir. Adamyň ruhy belent bolanda, her adamyň ruhy jemlenip, halkyň ruhuny emele getirýär. Her adamyň ruhy belent bolanda, halkyň ruhy belent bolýar.

(288-nji sah.) 

Biziň jigerimiz Allatagalanyň mübärek demi bilen işläp durandyr, biziň jigerimiz mähir-muhabbetden, söýgüden, ylahy nurdan püre-pür, ruhy nygmatlardan doly jadyly saçak. Ondan alyp, özgelere paýladygyňça, hazynasy köpeler, aýadygyňça, azalar, gurar!

(298-nji sah.) 

Adam Hudaýa tarap barýar! Ähli beýik dinler, adam ýogalandan soň, ruhy päklenip, hökman Allanyň dergähine barmaly diýýärler.

Adam dirikä şol ýola düşmeli.

Biz Hudaýyň dergähine barýan bolsak, onuň ýanyna barmaga mynasyp bolmagymyz gerek.

(300-nji sah.) 

Allanyň bendesiniň ýagşysyny ýaýyň, ýamanyny, belki, onuň özi düzeder.

(302-nji sah.) 

Ruhuňyz beýik bolsun! Ruh ynsan göwresine Allatagalanyň salan jan guşudyr, mübärek demidir, päkize, keremli nepesidir. Allatagala ony dabaraly ýaşaýyşda tug ýaly pasyrdadyp, hoş bolup, keýp bilen ýaşarsyňyz diýip berendir.

Ýaşaýan wagtyňyz ruhuňyzy beýikde tutuň, goý, ol siziň şahsy tuguňyz ýaly al-asmanda pasyrdap, ganat kaksyn! Ahyry ýene Allatagala öwrülip barjak ruhuňyzdyr. Onuň dergähine göýdük, gamgyn, para-para bolan perişan ruhly baryp bolmaz! Ýaşaýşy, durmuşy, bala-çagalaryňyzy söýüň!

(304-nji sah.) 

Ruh — biziň gursagymyzda Allatagaladan parçadyr! Allanyň bagyş eden ruhuny mynasyp beýiklikde saklamak parzdyr

(305-nji sah.) 

Alla ýaradandyr — ýaradyjydyr.

(321-nji sah.) 

Allanyň öňünde imanyň, milletiň öňünde zähmetiň seniň iň uly güwäňdir.

(330-njy sah.) 

...Allatagala adamy nurdan-ruhdan ýaratdy, ähli baýlyklar bolsa maddadandyr, adamyň hyzmatynda bolmalydyr.

(359-njy sah.) 

Ýagşylyk, päli päklik, ýagtylyk Alladandyr.

(403-nji sah.)