Her bir türkmen ruhubelent bolup, XVII asyra çenli öz ykbalyny  milletiň, döwletiň, jemgyýetiň, maşgalanyň agzybirligi, zähmeti, halallygy, ar-namysy, utanjy, mertligi, çydamlylygy bilen kesgitläpdir.

(13)

Ilki bilen, adamlaryň aňy, ruhy üýtgemeli. Her bir türkmen milletiniň taryhy ykbalyna, milli döwletine, jemgyýetine, onuň bütewiligine, agzybirligine jogapkärdir.

(14)

Gorkut ata ýaly il-ulusa kethudalyk edip, agzybirligi berkarar edýän gojalarymyz bar biziň!

(26)

Kyblam atamyň, käbäm ejemiň ruhlary:

Allatagala türkmeniň dört gerçegine — Oguz han Türkmene, Gorkut ata, Görogla, Magtymgula pygamberlik ýüküni urdy. Bu gün Allatagalanyň ol ýüki seniň gerdeniňde. Ömrüňi türkmen milletini agzybir saklap, altyn ýaşaýyşda döwran sürmegine bagyş et, ýol görkez, oglum! — diýdiler.

(148)

Men türkmeniň başynyň belent, agzynyň bir bolmagyny, altyn ruhda, altyn ýaşaýyşda ýaşamagyny isleýärin.

(149)

Men siziň Jebislikde, Agzybirlikde, Abadançylykda, Ruhubelentlikde ýaşamagyňyzy isleýärin.

(149)

Şu gün Türkmenistan garaşsyz döwlet bolanyndan soň hem tire-taýpa gatnaşyklary umumy türkmen milletiniň agzybirligine zyýan ýetirýär. Men şu meselede, eziz türkmen halkym, saňa ýörite ýüzlenýärin:

Bitewi türkmen milleti täzeden döredi, diňe milletiň bähbidi, diňe milletiň agzybirligi, diňe milletiň bitewiligi, bölünmezligi Garaşsyz, baky Bitarap döwletiň mynasyp eýesi bolup biler.

(151)

Türkmen milleti saçagyny keramat bilip, ony mukaddeslik derejesine göteripdir. Saçak — türkmeniň agzybirliginiň nyşany, ol daşynda türkmenleri jem eýleýär. Saçak — türkmeniň kasamy. Türkmenden hanyň kim diýip soralanynda, ol «Desterhan!»  diýip jogap beripdir.

(152-153)

Bu gün Gorkut atamyzyň arzuw eden paýhas-parasadyna, agzybirligine ýetdik.

(153)

Türkmen halky agzybirlikden başlanýandyr.

(167)

Haýsy ýurt ösýän bolsa, şol ýurtda agzybirlik bardyr!

(167)

Hudaýa şükür, agzybir ýurdumyz bar, agzybir halkymyz bar. Biz şu agzybirligimiziň gadyryny bilmelidiris, ony goramalydyrys.

(167)

Agzybirlik öz-özünden bolmaýar, agzybirligi güýjüň, hökümiň permany bilen hem saklap bolmaýar. Eger biziň saýlap alan ýolumyz dürs bolmadyk bolanynda, wagyz-nesihat bilen, gije-gündiz öwüt bereniň bilen ýurtda agzybirligi bina edip bolmazdy. Biziň berkarar agzybirligimizde bäş ýarym milliondan gowrak halkymyzyň bähbidi bar, şol bähbit hem ähli halkymyzy bir ojak deý, bir saçak deý birleşdirip dur.

(167)

Biziň agzybirligimiziň mizemezligi — biziň saýlap alan ýolumyzyň hakyky türkmen ýoly bolup, şol ýolda milli bähbitlerimiziň, her bir adamyň şahsy bähbitleriniň gözbaşlary bar. Eger biziň saýlap alan ýolumyz ters bolanynda, her kim bir tarapa çekerdi.

(167)

Ýurt diýeniň ullakan gämi bolýar, her bir raýaty kürekçi. Her raýat bir tarapa kürek ursa, gämi ornundan gozganmaz! Eger ähli kürekçi bir başa bakyp, şonuň buýruşy boýunça agzybir, birsydyrgyn kürek ursalar, gämi çalt hem uzaklara gider. Biziň agzybirligimiziň belli bir bahasy ýokdur.

(167)

Ýadyňyza salyň, on sekizinji asyrda beýik Magtymguly türkmenleriň agzybirligini dikeltjek bolup, nähili gygyrdy, bagryny ýakdy, emma ony eşitmediler. Sebäbi türkmeniň başyny bir edip oturan serdary ýokdy! Bir tiräniň hany ikinji tiräniň hany bilen bir çukura tüýkürip birleşmegi üçin biriniň kiçiräk bolmagy gerekdi, emma, hany, kiçelip bilýän han?

(169)

Halkymyzyň, ýurdumyzyň agzybirligi haçan mizemez bolýar? Haçan biziň kalbymyzda, ruhumyzda döwlet agzybirligi doga kibi gaýtalanýan bolsa...

(169)

Biziň agzybirligimiz her bir maşgaladan başlasa, mizemez bolar!

(169)

Agzybirlik — ojakdyr. Agzybirlik saçakdyr! Ojagyňyz keramatly, saçagyňyz halal bolsun!

Agzybirlik — döwletiň ambary, hazynasydyr! Hazyna halkyňky! Hazynasyny goramaýan halk özüni ýitirer.

Agzybirlik — ebedi türkmen milletiniň baş ýörelgesidir!

(170)

Türkmen halky soňky sekiz asyrda agzalalygyň näme­digine set müň uruş arkaly göz ýetirdi. Sekiz asyrlap töwerekdäki, ýakyn-u-daşdaky döwletler «Agzyny alart-da höküm sür»  syýasatyny ýöredip, türkmen taýpa-tireleriniň agzyny alardyp, maýdaly-irili uruşlara sezewar etdiler(267-268)

(267-268)

Eposlarymyzda, dessanlarymyzda, ýüzlerçe şahyrlarymyzyň şygyrlarynda agzybirligiň wasp edilmesi ýöne ýere däldir. Garaşsyz Türkmenistan döwletini yglan eden badymyza, tutuş halkymyz ony sekiz asyrlap arzuw edilen milli döwlet hökmünde kabul etdi.

(268)

Garaşsyz, Baky Bitarap Türkmenistan ummasyz baý döwlet, döwletde agzybirlik bolsa, halklar baý bolup biljek — muňa Türkmenistanyň ähli raýatlary dogry düşündiler.

Türkmenistanyň hiç bir ýerinde hiç hili dawa-jenjel, birek-biregi kemsitme ýok. Türkmenistanda syýasy durnuk­lylyk höküm sürüp, halklar bir döwletlilik pikiri arkaly dost­laşýar, doganlaşýar.

(268)

Oguz han Türkmeniň öküz sypaty zähmetsöýerlik, jepakeşlik, erklilik, güýçlülik, döwletlilik alamatlaryny özünde jemleýär. Eger onuň ýoly bitewilik, agzybirlik hem-de jebislik ýoly bolsa, onda bu ýoluň jepakeşlik, erklilik, güýçlülik we zähmetsöýerlik ýaly ýörelgeleri bardyr.

(290)

Arassalyk, päkizelik ynsapdan çykman, halallyga gol ýapmakdyr. Ten arassalygy kalp arassalygy bilen utgaşanda, adam adam bolýandyr. Ten arassa bolup, kalp hapa bolsa, bu iň ýigrenji zatdyr.

(332-333)

Mydama halkyň agysyna aglap, şatlygyna şatlansaň, agzybir bolsaň, başyňa döwlet guşy gonar. Il-günüň — keramatdyr. Delalaty şondan gözle!

(336)

Türkmen Garaşsyz jemgyýetde bir jan-bir ten bolup, dost bolup, dogan bolup agzybirlikde ýaşamalydyr.

(354)

Baýlygy halal gazanmak, halal baýlary köpeltmek jemgyýetiň agzybirligi, sagdynlygy we asudalygy baradaky aladalar bilen baglanyşyklydyr. 

(361)

Eziz türkmenim! Bagtly we şowly günler, gynançly we şowsuz günler türkmen bolup jebis birleşiň, millet agzybir bolanda ýeňip bolmajak güýç ýokdur!

(383)

Türkmenler, her bir ösen döwründe, diňe içki oňşuk­syzlyklar, özara uruşlar zerarly birek-biregi gyryp, kuwwatly döwletlerini ýykypdyrlar. Biz muny sapak edinip, agzybir­ligimizi has-da berkitmelidiris.

(383)

Biziň Baýdagymyzda türkmen gölleriniň bolmagy — biziň üçin milli gymmatlyklaryň we milli agzybirligiň ileri tutulýan zatdygyny aňladýar.

(400-401)

Pytraňňylyk, dagynyklyk dünýäniň başyna köp külpetler getirdi, ony halas edip biljek zat jebisleşmekdir, birleşmekdir, agzybir bolmakdyr.

(403)

Ýagşyzada ýaly ata-babalarymyzyň, perişde ýaly enelerimiziň haky üçin birek-birege mährem bolalyň, birek-birege gardaş hem syrdaş bolalyň, ýurduň binasy mähirden-muhabbetden bolsun!(404)

(404)

Dostluk, doganlyk, agzybirlik, adalatlylyk, parasatlylyk ýollaryny guralyň, dostlaşyp utulan, doganlaşyp zyýana galan ýokdur!

(404)