Türkmen döwletiniň durmuş maksatly syýasaty «Durmuş-ykdysady özgertmeleriň 2010-njy ýyla çenli döwür üçin Baş ugry» maksatnamasynda öz beýanyny tapdy. Baş ugur Garaşsyzlyk ýyllarynda gazanylan ykdysady ösüşleri hasaba almak bilen, halkyň durmuş ýagdaýyny gowulandyrmak maksatnamalaryny ileri tutmak ugruny dowam etdirýär. Häzir Türkmenistan esasy azyklyk önüm bolan gallany özi öndürýän döwletleriň hataryna goşuldy. Ýurt ykdysady howpsuzlyk babatdaky toplumlaýyn Maksatnamasynyň esasy bölegini ýerine ýetirdi. Türkmen halkynyň işleriniň we üstünlikleriniň dünýäde ýokary baha mynasyp bolýandygy bizi begendirýär.

(280)

Ykdysady ösüşiň depgini ähli ugurlarda 18 prosentden az bolmaly däldir!

Türkmenistanda özgertmeleriň Baş ugry bellenilen döwürde ykdysady ösüşiň ortaça ýyllyk depgininiň ykdysadyýetiniň ähli ugurlarynda 18 prosentden az bolmazlygyny göz öňünde tutýar. 2010-njy ýyla çenli möhletde baş wezipeleriň biri — önümçiligi ösdürmekdir. Hemişe bolşy ýaly, bu babatda esasy orun ýangyç-energetika toplumyna degişlidir. Zähmeti köp talap edýän pudaklara ünsi jemlemek bellenilýär. Mümkinçiliklerini göz öňünde tutsaň, olaryň geljegi uludyr we bäsleşige gaýymdyr. Olar: oba hojalygy, ýeňil, azyk senagaty, turizm, ýaşaýyş-jaý gurluşygy we infrastrukturalaryň döredilmegidir.

(281)

2005-nji ýyla çenli 2,5 million tonna pagta, 2,5 million tonna bugdaý öndürmek bellenilýär

 2010-njy ýyla çenli bolan döwürde oba hojalygynda gazanylmaly ösüşleriň iň esasysy möhüm önümleriň — pagtanyň we bugdaýyň öndürilişini artdyrmak bolup durýar. 2005-nji ýylda 2,5 million tonna pagta, 2,5 million tonna bugdaý öndürmek bellenilýär. Hut üstümizdäki ýylda 2 million tonna türkmen gallasy ýygnaldy. Deňeşdirip göreliň: Garaşsyzlygyň birinji ýylynda Türkmenistan 70 müň tonna galla öndüripdi. Şu sanlarda biziň Garaşsyzlygymyzyň miweleri, biziň öz ilatymyzy, şeýle hem zeminiň adamlaryny ýaşaýyş üçin birinji derejeli möhüm azyk önümi bilen üpjün etmek baradaky meseläni çözmäge goşan goşandymyz aýdyň görünýändir. Milli ykdysadyýeti ösdürmegiň uzak möhletleýin ugry bar bolan mümkinçiligiň ep-esli artdyrylmagyny göz öňünde tutýar, bu bolsa öz gezeginde, tutumly maýa goýumlarynyň goýulmagy bilen şertlenýär. 2010-njy ýyla çenli maliýeleşdirmegiň ähli çeşmeleriniň hasabyna maýa goýumlary 2000-nji ýyl bilen deňeşdireniňde 2,7 esse artar.

(281)

Ilatyň ýaşaýyş derejesiniň ýokarlandyrmak

Türkmenistanyň 2010-njy ýyla çenli döwre niýetlenen durmuş syýasatynyň özenini ilatyň ýaşaýyş derejesiniň görkezijilerini ýokarlandyrmak meselesi eýeleýär. Hemişe bolşy ýaly, büjet serişdeleriniň önjeýli bölegi durmuş pudagyna, onuň ösüşine gönükdirilýär. Ilatyň ösmegini hasaba almak bilen, täze durmuş desgalarynyň gurulmagy, döredilen infrastrukturanyň netijeli peýdalanylmagy hem gözden salnanok. Ilata gazy, suwy, elektrik toguny, duzy mugt bermegi dowam etdirip, ilatyň mätäç böleginiň goraga alynjakdygy hem ýörite nygtalýar.

(282)

Ykdysadyýetiň döwlete degişli däl bölegi

Özgertmeleriň barşynda ykdysadyýetiň döwlete degişli däl bölegi-de ep-esli öser. Bu pudakda kärhanalaryň sany mese-mälim köpeler. Bu özgertmeler eýeçiligiň şahsy we garyşyk görnüşleriniň ösdürilmegi, hususylaşdyrmagyň çaltlandyrylmagy, hojalyk edaralarynyň (daýhan birleşikleriniň we alyjylar birleşikleriniň) guramaçylyk-hukuk görnüşleriniň kämilleşdirilmegi bilen has-da öňe gider. Maksatnama laýyklykda bellenen döwrüň aýaklarynda üç müň sany döwlet kärhanasyny we desgalaryny hususy eýeçilige bermek amala aşyrylar.

(282)

Maksadymyz — Türkmenistany gülletmek

Biziň maksadymyz — Türkmenistany gülleýän ýurda öwürmek, onuň her bir adam üçin ygtybarly, mähriban öý bolmagyny gazanmak. Garaşsyz Türkmenistanyň ähli döwlet maksatnamalarynyň esasynda halkyň hal-ýagdaýynyň derejesini gyşarnyksyz ýokarlandyrmak, onuň hukuklarynyň mizemezligini gazanmak hyjuwy durýar.

(282)